നിയമന ഉത്തരവ് നടപ്പാക്കിയില്ലെങ്കില് ജയിലിലാക്കും; റാണി ജോര്ജിന് സുപ്രീം കോടതി മുന്നറിയിപ്പ്
ന്യൂഡല്ഹി: വയനാട്ടിലെ ഹൈസ്കൂള് മലയാളം അധ്യാപക നിയമനത്തിലെ സുപ്രീം കോടതി ഉത്തരവ് നടപ്പാക്കിയില്ലെങ്കില് കടുത്ത നടപടികളിലേക്ക് നീങ്ങുമെന്ന് സുപ്രീം കോടതി. പത്താം തീയതിക്കുള്ളില് ഉത്തരവ് നടപ്പാക്കിയില്ലെങ്കില് വിദ്യഭ്യാസ വകുപ്പ് പ്രിന്സിപ്പല് സെക്രട്ടറിയെ ജയിലില് അയക്കുമെന്ന് സുപ്രീം കോടതി മുന്നറിയിപ്പ് നല്കി. വിദ്യാഭ്യാസ വകുപ്പ് പ്രിന്സിപ്പല് സെക്രട്ടറി റാണി ജോര്ജിനാണ് മുന്നറിയിപ്പ് നല്കിയത്.
റാണി ജോര്ജ് പ്രഥമദൃഷ്ട്യാ കോടതിയലക്ഷ്യം നടത്തിയെന്നും സുപ്രീം കോടതി നിരീക്ഷിച്ചു. വയനാട്ടിലെ ഹൈസ്കൂള് മലയാളം അധ്യാപക നിയമനത്തില് ഉത്തരവ് മനഃപ്പൂര്വം നടപ്പാക്കിയില്ലെന്ന ആരോപണത്തില് സുപ്രീം കോടതി റാണി ജോര്ജിന് കോടതി അലക്ഷ്യ നോട്ടീസ് അയച്ചിരുന്നു. ജസ്റ്റിസ് വിക്രം നാഥ് അധ്യക്ഷനായ ബെഞ്ചാണ് കോടതി അലഷ്യ ഹര്ജി പരിഗണിക്കുന്നത്. അവിനാശ് പി., റാലി പി.ആര്., ജോണ്സണ് ഇ.വി., ഷീമ എം. എന്നിവരെ വയനാട് ജില്ലയിലെ ഹൈസ്കൂള് മലയാളം അധ്യാപികമാരായി നിയമിക്കാന് സുപ്രീം കോടതി കഴിഞ്ഞ വര്ഷം ഒക്ടോബറില് നിര്ദേശിച്ചിരുന്നു.
2011-ലെ പി.എസ്.സി. ലിസ്റ്റ് പ്രകാരം നാലുപേരുടെ നിയമനം ഒരു മാസത്തിനുള്ളില് നടത്താനായിരുന്നു ഉത്തരവ്. എന്നാല്, ഈ ഉത്തരവ് റാണി ജോര്ജ് മനഃപ്പൂര്വം നടപ്പിലാക്കിയില്ലെന്ന് കോടതി അലക്ഷ്യ ഹര്ജിയില് ഹാജരായ സീനിയര് അഭിഭാഷകന് വിവേക് ചിബും അഭിഭാഷകന് ദിലീപ് പോളക്കാടും ചൂണ്ടിക്കാട്ടി.
സുപ്രീം കോടതി ഉത്തരവ് നിലനില്ക്കുമ്പോള് ഒഴിവുണ്ടായിരുന്ന തസ്തികകളിലേയ്ക്ക് മറ്റ് ആള്ക്കാരെ നിയമിക്കാന് സര്ക്കാര് ശ്രമിച്ചുവെന്നും ഹര്ജിക്കാര് ആരോപിച്ചു. സംസ്ഥാന സര്ക്കാരിനുവേണ്ടി സീനിയര് അഭിഭാഷകന് പി.എന്. രവീന്ദ്രനും സ്റ്റാന്ഡിങ് കോണ്സല് നിഷേ രാജന് ഷോങ്കാറും ഹാജരായി.
