കണ്ണൂർ: കണ്ണൂർ ന്യൂമാഹി പുന്നോലിൽ സ്വകാര്യ ബസുകൾ കൂട്ടിയിടിച്ച് 30 ഓളം പേർക്ക് പരിക്കേറ്റു. കണ്ണൂരിൽ നിന്ന് കോഴിക്കോട്ടേക്ക് പോകുന്ന ബസും കോഴിക്കോട് നിന്ന് കണ്ണൂരിലേക്ക് പോകുന്ന ബസും തമ്മിലാണ് അപകടത്തിൽപ്പെട്ടത്.
ഓവർടേക്ക് ചെയ്യുന്നതിനിടെയാണ് അപകടം ഉണ്ടായത് എന്നാണ് പ്രാഥമിക വിവരം. ദേശീയപാതയിലെ പുന്നോൽ ഭാഗത്ത് എതിർദിശകളിൽ നിന്ന് വന്ന ബസുകൾ നേർക്ക് നേർ കൂട്ടിയിടിക്കുകയായിരുന്നു.അപകടത്തിന്റെ ആഘാതത്തിൽ ബസുകളുടെ മുൻഭാഗം പൂർണമായും തകർന്നു. അകത്ത് കുടുങ്ങിയ യാത്രക്കാരെ പുറത്തെടുക്കുന്നതിന് ഫയർഫോഴ്സിന്റെയും നാട്ടുകാരുടെയും സഹായം തേടേണ്ടി വന്നു. അപകടത്തിൽപ്പെട്ട ബസിന്റെ മുൻഭാഗം തകർന്നതിനെ തുടർന്ന് ഫയർഫോഴ്സും നാട്ടുകാരും ചേർന്ന് ഭാഗങ്ങൾ കുത്തിപ്പൊളിച്ചാണ് യാത്രക്കാരെ പുറത്തെടുത്തത്.
അപകടത്തിൽ പരിക്കേറ്റവരെ തലശ്ശേരിയിലെ വിവിധ ആശുപത്രികളിലേക്ക് മാറ്റി. പരിക്കേറ്റവരിൽ ഭൂരിഭാഗവും നിസാര പരിക്കുകളോടെ ചികിത്സയിലാണ്. പോലീസ് സ്ഥലത്തെത്തി ഗതാഗതം നിയന്ത്രിച്ചു. അപകടത്തെ തുടർന്ന് ദേശീയപാതയിൽ ഏറെ നേരം ഗതാഗതം തടസ്സപ്പെട്ടു.പിന്നീട് പോലീസും ഫയർഫോഴ്സും ചേർന്ന് വാഹനങ്ങൾ മാറ്റിയതോടെയാണ് ഗതാഗതം പുനഃസ്ഥാപിച്ചത്. അപകടത്തിൽ പരിക്കേറ്റ ആരുടേയും നില ഗുരുതരമല്ല എന്നാണ് ആശുപത്രി വൃത്തങ്ങൾ നൽകുന്ന വിവരം.
അപകട കാരണം സംബന്ധിച്ച് പോലീസ് അന്വേഷണം ആരംഭിച്ചിട്ടുണ്ട്. ബസുകളുടെ രേഖകളും ഡ്രൈവർമാരുടെ മൊഴിയും പരിശോധിച്ചുവരികയാണ്.
