Kozhikode
കൊയിലാണ്ടി ഗുരുദേവ കോളേജിൽ സംഘര്ഷം; എസ്എഫ്ഐക്കാര് പ്രിൻസിപ്പലിനെ മര്ദ്ദിച്ചെന്ന് പരാതി, ചികിത്സ തേടി
കോഴിക്കോട്: കൊയിലാണ്ടി ഗുരുദേവ കോളേജില് എസ്എഫ്ഐക്കാരുടെ മര്ദ്ദനത്തിൽ പ്രിൻസിപ്പലിന് പരിക്കേറ്റതായി പരാതി . ഇന്ന് ഡിഗ്രി പ്രവേശനവുമായി ബന്ധപ്പെട്ട് ഹെല്പ്പ് ഡസ്ക് ഇടുന്നതിൽ തര്ക്കമുണ്ടായിരുന്നു.ഒരു വിഭാഗം എസ്എഫ്ഐക്കാർ എത്തി കൈ പിടിച്ചു തിരിക്കുകയും മര്ദ്ദിക്കുകയും ചെയ്തെന്ന് പ്രിന്സിപ്പല് സുനിൽ കുമാർ ആരോപിച്ചു.
പ്രിൻസിപ്പലും കോളേജിലെ ഒരു അധ്യാപകനും കൊയിലാണ്ടി താലൂക്ക് ആശുപത്രിയിൽ ചികിത്സ തേടി. പൊലീസിൽ പരാതി നൽകുമെന്ന് പ്രിൻസിപ്പൽ അറിയിച്ചു.അതിനിടെ അധ്യാപകര് മര്ദ്ദിച്ചെന്ന് ആരോപിച്ച് എസ്എഫ്ഐ പ്രവര്ത്തകരായ വിദ്യാര്ത്ഥികളും രംഗത്തെത്തി. എസ്എഫ്ഐ കൊയിലാണ്ടി ഏരിയാ പ്രസിഡന്റ് അഭിനവ് താലൂക്ക് ആശുപത്രിയില് ചികിത്സ തേടി.
