കോളജിലേക്ക് പോകും വഴി ദുരന്തം; പരവൂരിൽ ബൈക്ക് യാത്രികനായ എൻജിനീയറിങ് വിദ്യാർഥിക്ക് ദാരുണാന്ത്യം
കൊല്ലം: പരവൂർ – പൊഴിക്കര റോഡിൽ വാഹനങ്ങൾ കൂട്ടിയിടിച്ചുണ്ടായ ദാരുണമായ അപകടത്തിൽ കോളജ് വിദ്യാർഥി മരിച്ചു. പൊഴിക്കര കോങ്ങാൽ എൺ മഠത്തിൽ മനോജിന്റെ മകൻ അഭിമന്യു (20) ആണ് മരണപ്പെട്ടത്. കൊല്ലം ടികെഎം എൻജിനീയറിങ് കോളജിലെ മൂന്നാം വർഷ സിവിൽ എൻജിനീയറിങ് വിദ്യാർഥിയാണ് അഭിമന്യു.
വ്യാഴാഴ്ച രാവിലെ കോളജിലേക്ക് പോകുന്ന വഴിയായിരുന്നു സംഭവം. ദൃക്സാക്ഷികൾ നൽകുന്ന വിവരപ്രകാരം, തയ്യിൽ ജംക്‌ഷനിലെത്തിയപ്പോൾ അഭിമന്യു സഞ്ചരിച്ച വാഹനത്തിന് മുന്നിൽ പോയ വാൻ പെട്ടെന്ന് ബ്രേക്കിടുകയായിരുന്നു. തുടർന്ന് വാനിൽ ഇടിച്ച വാഹനം നിയന്ത്രണംവിട്ട് എതിർദിശയിൽ വന്ന സ്കൂട്ടറിലും ഇടിക്കുകയായിരുന്നു.
അപകടത്തിന്റെ ആഘാതത്തിൽ അഭിമന്യു റോഡിലേക്ക് തെറിച്ചുവീഴുകയായിരുന്നുവെന്ന് ദൃക്സാക്ഷികൾ പറയുന്നു. അപകടത്തെ തുടർന്ന് മൃതദേഹം പാരിപ്പള്ളി മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി. സംഭവവുമായി ബന്ധപ്പെട്ട് ആവശ്യമായ തുടർനടപടികൾ അധികൃതർ സ്വീകരിച്ചുവരുന്നു.
