കൊച്ചി: നടിയെ ആക്രമിച്ച കേസില് മുഖ്യപ്രതി പള്സര് സുനിയുടെ ജാമ്യഹര്ജി ഹൈക്കോടതി തള്ളി. ജാമ്യം നല്കരുതെന്ന പ്രോസിക്യൂഷന് വാദം അംഗീകരിച്ചാണ് ജസ്റ്റിസ് പിവി കുഞ്ഞികൃഷ്ണന്റെ ഉത്തരവ്. കഴിഞ്ഞ ആറുവര്ഷമായി താന് ജയിലിലാണെന്നും ജാമ്യം ലഭിച്ചിട്ടില്ലെന്നും കാണിച്ചാണ് സുനി ജാമ്യാപേക്ഷയുമായി ഹൈക്കോടതിയെ സമീപിച്ചത്.
കേസിന്റെ നിര്ണായകമായ ഈ ഘട്ടത്തില് ജാമ്യം അനുവദിക്കരുതെന്ന പ്രോസിക്യൂഷന് ആവശ്യം അംഗീകരിച്ചാണ് കോടതി പള്സര് സുനിയുടെ ജാമ്യഹര്ജി തള്ളിയത്. ഇത്രയും വര്ഷമായി പ്രതി ജയിലില് കിടന്നു എന്നതുകൊണ്ടു മാത്രം മോചനത്തിന് കാരണമാവില്ലെന്നും കോടതി ചൂണ്ടിക്കാട്ടി. നടിക്കു നേരെയുണ്ടായത് ക്രൂരമായ പീഡനമാണെന്ന് കോടതിക്കു ബോധ്യപ്പെട്ടതായി നേരത്തെ അറിയിച്ചിരുന്നു.
