ഫുട്ബോള് ലഹരി ആകരുത്, താരാരാധന അതിരുകടക്കരുത്; വിശ്വാസികള് നമസ്കാരം ഉപേക്ഷിക്കുന്നു; ബോധവല്ക്കരണത്തിനൊരുങ്ങി സമസ്ത
കോഴിക്കോട്: നാടാകെ ലോകകപ്പ് ഫുട്ബോളിന്റെ ആവേശം കൊടുമ്പിരികൊണ്ടിരിക്കെ ലോകകപ്പ് ടൂര്ണമെന്റിനെ എങ്ങനെ സമീപിക്കണമെന്ന് വിശ്വസികള്ക്ക് നിര്ദ്ദേശവുമായി സമസ്ത.
ഫുട്ബോള് ലഹരി ആകരുതെന്നും താരാരാധന അതിരുകടക്കരുതെന്നും സമസ്ത. പള്ളികളില് ഇന്ന് പ്രാര്ത്ഥനയ്ക്ക് ശേഷം ഈ മുന്നറിയിപ്പ് നല്കുമെന്ന് ജനറല് സെക്രട്ടറി നാസര് ഫൈസി കൂടത്തായി പറഞ്ഞു. ലോകകപ്പ് തുടങ്ങിയതോടെ വിശ്വാസികള് നമസ്കാരം ഉപേക്ഷിക്കുന്നത് ശ്രദ്ധയില് പെട്ടതായും നാസര് ഫൈസി ചൂണ്ടിക്കാട്ടി.
സാമ്പത്തികമായി ദുരിതമനുഭവിക്കുന്ന ഈ കാലഘട്ടത്തില് നിത്യ ഭക്ഷണത്തിന് പോലും മനുഷ്യന് പ്രയാസമനുഭവിക്കുമ്പോള് വമ്പിച്ച സമ്പത്ത് കട്ടൗട്ടുകള് ഉയര്ത്താനും മറ്റുമായി ചെലവാക്കുന്ന അവസ്ഥ യുവാക്കള്ക്കിടയില് വ്യാപകമായി മാറുകയാണ്. അതോടൊപ്പം കുട്ടികളുടെ പഠനങ്ങള്ക്ക് പോലും ഭംഗം വരുകയും ചെയ്യുന്ന സാഹചര്യത്തിലാണ് സമസ്തയുടെ ഖുത്തുബ കമ്മിറ്റി ഇത്തരത്തിലൊരു നിര്ദ്ദേശം നല്കിയിരിക്കുന്നതെന്നും നാസര് ഫൈസി കൂടത്തായി പറഞ്ഞു.
തങ്ങള് പുതുതലമുറയുടെ വികാരങ്ങള് ഉള്ക്കൊള്ളുന്നവരും അതിനെ നിരുത്സാഹപ്പെടുത്താത്തവരുമാണ്. എന്നാല് ഇത് ജ്വരമായി മാറുന്നതിനെയാണ് എതിര്ക്കുന്നതെന്നും നാസര് ഫൈസി കൂടത്തായി പറഞ്ഞു.
