കോഴിക്കോട്: നിയന്ത്രണം വിട്ട ബൈക്ക് പോസ്റ്റിലിടിച്ച് ഇതരസംസ്ഥാനക്കാരായ രണ്ട് യുവാക്കള് മരിച്ചു. ചെന്നൈ ഡെന്റിഗൽ അർഎം കോളനി എയ്റ്റ് ക്രോസ് റോഡിൽ പ്രസന്നകുമാര് (22), കാമരാജ് ശാല ചിന്നാലപ്പെട്ടി ഷണ് മുഖപ്രകാശ് (22) എന്നിവരാണ് മരിച്ചത്. രണ്ടു പേരും കോഴിക്കോട് സ്വകാര്യ സ്ഥാപനത്തിൽ സൈബർ സെക്യൂരിറ്റി കോഴ്സിന് പഠിക്കുകയായിരുന്നു. ഇന്നലെ പുലര്ച്ചെ രണ്ടോടെ ശ്മശാനം റോഡില് കുനിയില്കാവ് ഭാഗത്താണ് അപകടമുണ്ടായത്.
രണ്ടുപേരും അപകടസ്ഥലത്തുവച്ചുതന്നെ മരിച്ചു. മറ്റ് യാത്രക്കാര് വിവരമറിയിച്ചതനുസരിച്ചാണ് പോലീസ് സ്ഥലത്തെത്തിയത്. ഇവര് സഞ്ചരിച്ച ഡ്യൂക്ക് ബൈക്ക് പോസ്റ്റിനോട് ചേര്ന്ന് ഇടിച്ച നിലയിലാണ്. നടക്കാവ് പോലീസ് എത്തി തുടര് നടപടികള് സ്വീകരിച്ചു. മൃതദേഹം കോഴിക്കോട് മെഡിക്കല് കോളജ് മോര്ച്ചറിയിലേക്ക് മാറ്റി. വൈകുന്നേരത്തോടെ ബന്ധുക്കള് എത്തി മരിച്ചവരെ തിരിച്ചറിഞ്ഞു
