ഓണാഘോഷം; ഭക്ഷ്യവസ്തുക്കളുടെ ഗുണനിലവാരം ഉറപ്പാക്കാന് പ്രത്യേക പരിശോധന ഏർപ്പെടുത്തി
തിരുവനന്തപുരം : ഓണക്കാലത്ത് വിതരണം ചെയ്യുന്ന ഭക്ഷ്യവസ്തുക്കളുടെ ഗുണനിലവാരവും, സുരക്ഷയും ഉറപ്പുവരുത്തുന്നതിന് വേണ്ടി കര്ശന പരിശോധന ഏർപ്പെടുത്തി ആരോഗ്യ മന്ത്രി വീണാ ജോര്ജ്. ഒപ്പം ഓണക്കാല പരിശോധനയ്ക്കായി പ്രത്യേക സ്ക്വാഡിനെ നിയോഗിക്കുകയും ചെയ്തിട്ടുണ്ട് . ഭക്ഷ്യ സുരക്ഷാ കമ്മീഷണറുടെ ഏകോപനത്തില് ഭക്ഷ്യ സുരക്ഷാ ഉദ്യോഗസ്ഥര് പരിശോധനകള്ക്ക് നേതൃത്വം നല്കും.
ഓണക്കാലത്ത് അധികമായി വാങ്ങി ഉപയോഗിക്കുന്ന പാല്, ഭക്ഷ്യ എണ്ണകള്, പപ്പടം, ശര്ക്കര, പായസം മിക്സ്, നെയ്യ്, പച്ചക്കറികള്, പഴങ്ങള്, പരിപ്പുവര്ഗങ്ങള്, മത്സ്യം, മാംസം തുടങ്ങിയവയുടെ വിതരണ കേന്ദ്രങ്ങളിലും, ഹോട്ടല്, ബേക്കറി, തട്ടുകടകള് എന്നിവടങ്ങളിലും ചെക്ക് പോസ്റ്റുകളിലും പരിശോധന നടത്തും . അതുപോലെ എല്ലാ സ്ഥാപനങ്ങളും ഭക്ഷ്യ സുരക്ഷാ മാനദണ്ഡങ്ങള് കൃത്യമായി പാലിക്കണമെന്ന് മന്ത്രി അഭ്യര്ത്ഥിച്ചു. എല്ലാ സ്ഥാപനങ്ങളും ഭക്ഷ്യസുരക്ഷാ ലൈസന്സ് ഉറപ്പാക്കേണ്ടതാണെന്നും.
ലേബല് വിവരങ്ങള് പൂര്ണമായിട്ടല്ലാതെ വില്പനയ്ക്ക് വെച്ചിരിക്കുന്ന ഭക്ഷ്യ വസ്തുക്കളും പരിശോധനക്ക് വിധേയമാക്കും. നിയമലംഘനം നടത്തുന്ന സ്ഥാപനങ്ങള്ക്കെതിരെ ഭക്ഷ്യസുരക്ഷ ഗുണനിലവാര നിയമം അനുസരിച്ച് നിയമനടപടികള് കൈക്കൊളളുമെന്നും ഭക്ഷ്യ സുരക്ഷാ കമ്മീഷണര് അറിയിച്ചു. വ്യാപാരികള് ഭക്ഷ്യ സുരക്ഷാ ലൈസന്സ്/രജിസ്ട്രേഷന് എടുക്കേണ്ടതും ഉപഭോക്താക്കള് കാണുന്ന വിധം സ്ഥാപനത്തില് പ്രദര്ശിപ്പിക്കേണ്ടതുമാണ്.
നിലവാരമില്ലാത്ത ഭക്ഷ്യവസ്തുക്കള് വില്പ്പനക്കായി സ്ഥാപനത്തില് സൂക്ഷിക്കുകയോ, വില്പ്പന നടത്തുകയോ ചെയ്യരുതെന്നും. പായ്ക്ക് ചെയ്ത ഭക്ഷണസാധനങ്ങള് നിയമാനുസൃതമായ ലേബല് വ്യവസ്ഥകളോടെ മാത്രമെ വില്ക്കാന് പാടുളളൂ. ഭക്ഷ്യവസ്തുക്കള് വിതരണം ചെയ്യുന്ന സ്ഥാപനങ്ങളും, വ്യക്തികളും ശുചിത്വ ശീലങ്ങള് കര്ശനമായും പാലിച്ചിരിക്കണം. ഉപഭോക്താക്കള്ക്ക് ഭക്ഷണത്തിന്റെ സുരക്ഷയെക്കുറിച്ച് പരാതിയുണ്ടെങ്കില് 1800 425 1125 എന്ന ടോള് ഫ്രീ നമ്പറില് ബന്ധപ്പെടാം. ഇതുകൂടാതെ https://www.eatright.foodsafety.kerala.gov.in/ എന്ന പോര്ട്ടല് മുഖേനയും പരാതി നല്കാം.
