ജവാന് മദ്യത്തിന്റെ ഉല്പ്പാദനം വർദ്ധിപ്പിക്കും; ഉല്പ്പാദന ലൈനുകളുടെ എണ്ണം നാലില്നിന്ന് ആറാക്കി ഉയർത്തും
തിരുവനന്തപുരം: ജവാന് മദ്യത്തിന്റെ ഉല്പ്പാദനം വർദ്ധിപ്പിക്കും. അടുത്ത ആഴ്ച മുതൽ ഉല്പ്പാദന ലൈനുകളുടെ എണ്ണം നാലില്നിന്ന് ആറാക്കി ഉയർത്തും. നിലവിൽ 8000 കേയ്സാണ് പ്രതിദിനം ഉത്പാദിപ്പിക്കുന്നത്. ഉല്പ്പാദന ലൈനുകളുടെ എണ്ണം ഉയർത്തുന്നതോടെ പ്രതിദിനം 12,000 കേയ്സ് മദ്യം ഉത്പാദിപ്പിക്കാൻ സാധിക്കും. ജവാന് റമ്മിന്റെ ഉത്പാദകരായ ട്രാവന്കൂര് ഷുഗര് ആന്ഡ് കെമിക്കല്സ്, മദ്യം നിര്മ്മിക്കുന്നതിനുള്ള എക്സ്ട്രാ ന്യൂട്രല് ആല്ക്കഹോള് സംഭരണം 20 ലക്ഷം ലിറ്ററില് നിന്ന് 35 ലക്ഷം ലിറ്ററാക്കി ഉയര്ത്താന് സര്ക്കാരിന് കത്ത് നല്കിയിരുന്നു.
സര്ക്കാര് അനുമതി ലഭിച്ചാൽ പ്രതിദിനം 15,000 കെയ്സ് മദ്യം ഉല്പ്പാദിപ്പിക്കാന് കഴിയും കൂടാതെ ഇനി മുതൽ ജവാൻ മദ്യം അര ലിറ്ററിൽ വിപണിയിലെത്തിക്കാനുള്ള പദ്ധതിയുമുണ്ട്. നിലവില് ഒരു ലിറ്റര് മാത്രമാണ് വിപണിയില് ലഭ്യമായിട്ടുള്ളൂ. ഒപ്പം പ്രീമിയവും പുറത്തിറക്കാനുള്ള ആലോചനയുണ്ട്. ഒരു മാസം 1.5 ലക്ഷം കെയ്സ് ജവാന് റമ്മാണ് സംസ്ഥാനത്ത് വിറ്റു പോകുന്നത്. 640 രൂപയാണ് ഒരു ലിറ്റര് ജവാന് റമ്മിന് വില. അര ലിറ്ററിൽ ലഭ്യമാകുന്നതോടെ കൂടുതൽ ജനപ്രിയമാകാനുള്ള സാധ്യതയുമുണ്ട്.
വിപണിയിലെ മറ്റു മദ്യ കമ്പനികളുടെ കുത്തക തകർക്കാൻ കൂടുതൽ ജവാൻ വിപണിയിലെത്തുന്നതോടെ സാധിക്കുമെന്നാണ് ബെവ്കോയുടെ പ്രതീക്ഷ. കഴിഞ്ഞ ബജറ്റ് പ്രഖ്യാപനം നടപ്പാകുന്നതോടെ സംസ്ഥാനത്ത് എല്ലാ മദ്യങ്ങൾക്കും വില വർദ്ധിച്ചിരുന്നു. മുൻപ് 610 രൂപയ്ക്ക് ലഭിച്ച ജവാൻ റം ഒരു ലിറ്റർ ബോട്ടിലിന് 640 രൂപയായി. മദ്യപാനികള്ക്കിടെയില് ഏറ്റവും ആരാധകരുള്ള മദ്യമാണ് ജവാന്. കഴിഞ്ഞ വര്ഷം ജവാന് റമ്മിന്റെ ഉത്പാദനം നിര്ത്തിവച്ചിരുന്നു. ട്രാവന്കൂര് ഷുഗേഴ്സ് ആന്ഡ് കെമിക്കല് ഫാക്ടറിയിലേക്ക് കൊണ്ടുവന്ന സ്പിരിറ്റില് വന് ക്രമക്കേട് കണ്ടെത്തിയതിനെ തുടർന്നായിരുന്നു തീരുമാനം.
