ലോകകപ്പ് നേട്ടത്തിന് പിന്നാലെ അര്ജന്റീന ടീമിലെ കളിക്കാര്ക്കും സപ്പോര്ട്ട് സ്റ്റാഫിനും സ്വര്ണ ഐഫോണുകള് സമ്മാനമായി നല്കാനൊരുങ്ങി ക്യാപ്റ്റൻ ലയണൽ മെസി. ഇതിനായി സ്വര്ണത്തില് പൊതിഞ്ഞ 35 ഐഫോണുകള് മെസി വാങ്ങിയതായി ദ സണ് റിപ്പോര്ട്ട് ചെയ്തു.ഇവ ശനിയാഴ്ച പാരിസില് മെസിയുടെ താമസ സ്ഥലത്ത് എത്തിച്ചിട്ടുണ്ട്.
24 കാരറ്റ് വരുന്ന 35 ഐഫോണുകള്ക്ക് 175,000 പൗണ്ട് (ഏകദേശം 1.73 കോടി രൂപ) ആണ് വില. ഓരോ കളിക്കാരന്റെയും പേരും ജേഴ്സി നമ്പറും അര്ജന്റീനയുടെ ലോഗോയും പതിപ്പിച്ച പ്രത്യേക ഐഫോണുകളാണിത്.
”ലോകകപ്പ് ഫൈനല് കഴിഞ്ഞ് ഏതാനും ആഴ്ചകള്ക്ക് ശേഷം അദ്ദേഹം ഞങ്ങളുമായി ബന്ധപ്പെട്ടു. ഐ ഡിസൈന് ഗോള്ഡിന്റെ ഏറ്റവും വിശ്വസ്തരായ ഉപഭോക്താക്കളില് ഒരാളാണ്. അദ്ദേഹം തന്റെ ആഗ്രഹം തങ്ങളെ അറിയിച്ചു. സാധാരണ ചെയ്യുന്നതു പോലെ വാച്ചുകള് സമ്മാനമായി നല്കാന് കരുതുന്നില്ലെന്നും മെസി പറഞ്ഞു.
അതിനാല് അവരുടെ പേരുകള് ആലേഖനം ചെയ്ത സ്വര്ണ ഐഫോണുകള് നല്കാമെന്ന് ഞാന് നിര്ദേശിക്കുകയായിരുന്നു. അദ്ദേഹത്തിന് എതിരഭിപ്രായമൊന്നും ഇല്ലായിരുന്നു” എ ഡിസൈന് ഗോള്ഡ് സിഇഒ ബെന് ലയണ്സ് വിശദീകരിച്ചു.
