ദില്ലി: സി പി എം കേന്ദ്ര കമ്മിറ്റി യോഗം ഇന്ന് ചേരും. രണ്ട് ദിവസമായി ചേരേണ്ട യോഗം കൊവിഡ് കണക്കിലെടുത്ത് ഓൺലൈനായി ഒറ്റ ദിവസം മാത്രമാണ് നടക്കുക. മുഖ്യമന്ത്രിക്കെതിരെ നടക്കുന്ന കേരളത്തിലെ പ്രതിപക്ഷ സമരവും വിമാനത്തിലെ പ്രതിഷേധവും യോഗത്തിൽ ചർച്ചയായേക്കും. മുഖ്യമന്ത്രിക്കെതിരെ വിമാനത്തിൽ ഉണ്ടായത് വധശ്രമമാണെന്ന ആരോപണമാണ് സംസ്ഥാന നേതൃത്വം ഉന്നയിച്ചത്.
അഗ്നിപഥ് പദ്ധതിക്കെതിരെ രാജ്യത്തുടനീളം നടക്കുന്ന സമരങ്ങളും കേന്ദ്രകമ്മിറ്റി യോഗത്തിൽ ചർച്ചയാകും. പദ്ധതി പിൻവലിക്കണമെന്ന് നേരത്തെ പൊളിറ്റ്ബ്യൂറോ ആവശ്യപ്പെട്ടിരുന്നു. പി ബി അംഗങ്ങളുടെ ചുമതലയും പാർട്ടി കോൺഗ്രസിൻറെ തീരുമാനങ്ങൾ നടപ്പാക്കേണ്ടത് സംബന്ധിച്ചും യോഗത്തിൽ തീരുമാനമുണ്ടാകും.
