വടകര: തൊഴിലുറപ്പ് പദ്ധതിപ്രകാരം ജില്ലയിൽ 2021-22 സാമ്പത്തികവർഷത്തിൽ ചെലവഴിച്ചത് 551.04 കോടിരൂപ. മുൻവർഷത്തേക്കാൾ നൂറുകോടിയോളംരൂപ കൂടുതലാണിത്. ഇതിന്റെ 60 ശതമാനവും വേതനമായി തൊഴിലാളികളുടെ അക്കൗണ്ടിലേക്കാണ് പോയത്. ജില്ലയിലെ ഭൂരിഭാഗം പഞ്ചായത്തുകളുടെയും ബ്ലോക്ക് പഞ്ചായത്തുകളുടെയും വാർഷികപദ്ധതിവിഹിതത്തെക്കാൾ കൂടുതലാണ് തൊഴിലുറപ്പ് പദ്ധതിവിഹിതമെന്ന പ്രത്യേകതയുമുണ്ട്.
തൊഴിൽദിനങ്ങൾ, 100 തൊഴിൽദിനം പൂർത്തിയാക്കിയവർ എന്നിവയുടെ എണ്ണത്തിലും റെക്കോഡ് നേട്ടമാണ് ഇത്തവണ ജില്ല കൈവരിച്ചത്. മാർച്ച് 31 വരെയുള്ള കണക്കു പ്രകാരം 2021-22 വർഷത്തിൽ സൃഷ്ടിക്കപ്പെട്ടത് 1.11 കോടി തൊഴിൽദിനങ്ങളാണ്. തുടർച്ചയായ രണ്ടാംവർഷമാണ് ജില്ലയിൽ തൊഴിൽദിനങ്ങൾ ഒരുകോടി കടക്കുന്നത്. ഇത്തവണ 60,516 കുടുംബങ്ങൾ നൂറു തൊഴിൽദിനം പൂർത്തിയാക്കി. ഇതും റെക്കോഡാണ്. ജില്ലയിലെ 12 ബ്ലോക്ക് പഞ്ചായത്തുകളിലും ആകെ ചെലവഴിച്ച തുക മുൻവർഷത്തേക്കാൾ അധികമാണ്.
