കോഴിക്കോട് : ഓക്സ്ഫോർഡ് സർവകലാശാലയിലെ എഞ്ചിനീയറിംഗ് വിഭാഗത്തിലെ പ്രമുഖ വിദ്യാഭ്യാസ വിദഗ്ധയായ ഡോ. നികിത ഹരിയ്ക്ക് ഗൂഗിളിന്റെ പ്രഥമ ഹയർ എഡ്യൂക്കേഷൻ ഫാക്കൽറ്റി എ ഐ ഫെല്ലോഷിപ്പും ‘അഡ്വാൻസ് ഹയർ എഡ്യൂക്കേഷൻ സീനിയർ ഫെല്ലോഷിപ്പും’ ലഭിച്ചു.
ഉയർന്ന വിദ്യാഭ്യാസ രംഗത്ത് കൃത്രിമ ബുദ്ധിയുടെ (AI) ഉത്തരവാദിത്വമുള്ള ഉപയോഗം, നവീന പഠനരീതികൾ, വിദ്യാർത്ഥികേന്ദ്രിത വിദ്യാഭ്യാസ മാതൃകകൾ എന്നിവയിൽ നൽകിയ സംഭാവനകളെ അടിസ്ഥാനമാക്കിയാണ് ഈ ഇരട്ട അംഗീകാരം ലഭിച്ചത്.
ഡോ. നികിത ഹരി ഇന്ന് ഓക്സ്ഫോർഡ് സർവകലാശാലയിലെ ടീച്ചിങ് , റിസേർച് ഡിസൈൻ ആൻഡ് സപ്പോർട്ട് ഗ്രൂപ്പിന്റെ മേധാവിയായാണ് പ്രവർത്തിക്കുന്നത്. എഞ്ചിനീയറിംഗ് വിദ്യാഭ്യാസം, AI അധിഷ്ഠിത പഠനരീതികൾ, സിസ്റ്റംസ് തിങ്കിംഗ്, സുസ്ഥിര വികസനം എന്നിവയെ ബന്ധിപ്പിക്കുന്ന ഗവേഷണ-പഠന പ്രവർത്തനങ്ങളിലൂടെയാണ് അവർ ആഗോള ശ്രദ്ധ നേടിയത്.
കേംബ്രിഡ്ജ് സർവകലാശാലയിൽ നിന്ന് ഇലക്ട്രോണിക് എഞ്ചിനിയറിങ്ങിൽ ഡോക്ടറേറ്റ് നേടിയ അവർ, പിന്നീട് ഓക്സ്ഫോർഡിൽ Schlumberger Faculty for the Future Post-Doctoral Fellow ആയി പ്രവർത്തിച്ചു. പിന്നീട് അക്കാദമിക് മേഖലക്ക് പുറമെ സ്റ്റാർട്ടപ്പുകൾ, ടെക്നോളജി കമ്പനികൾ, വിദ്യാഭ്യാസ നവീകരണ സംരംഭങ്ങൾ എന്നിവയിലും നേതൃത്വം വഹിച്ചു. AI അധിഷ്ഠിത എഡ്യൂക്കേഷൻ ടെക്ക് മേഖലയിലെ രണ്ട് സ്ഥാപനങ്ങളുടെ സഹസ്ഥാപകയും സി.ഒ.ഒയുമാണ് അവർ.
ഡോ. നികിത ഹരി ഒരു അക്കാദമിക് മാത്രമല്ല, ആഗോള വിദ്യാഭ്യാസ പരിഷ്കരണ ശബ്ദവുമാണ്. 100-ലധികം അന്താരാഷ്ട്ര പ്രഭാഷണങ്ങളും TEDx ടോക്കുകളും നടത്തിയ അവർ, “എ ഐ : മാർക്കറ്റിംഗ് ഓഫ് ബ്രേയ്ക്കിങ് എഡ്യൂക്കേഷൻ” എന്ന വിഷയത്തിലെ സംസാരത്തിലൂടെ പ്രത്യേക ശ്രദ്ധ നേടിയിരുന്നു. ലോകമെമ്പാടുമുള്ള ആയിരക്കണക്കിന് വിദ്യാർത്ഥികൾക്കും യുവ ഗവേഷകർക്കും അവർ മാർഗനിർദേശങ്ങൾ നൽകി വരുന്നു.
ബ്രിട്ടനിലെ “Top 50 Women in Engineering” പട്ടികയിൽ ഇടം നേടിയ അവർ, Imperial College London പ്രസിദ്ധീകരിച്ച “Engineers Making a Difference” പുസ്തകത്തിലും ഉൾപ്പെട്ടിട്ടുണ്ട്. കൂടാതെ Clinton Global Initiative Changemaker എന്ന അംഗീകാരവും ലഭിച്ചിട്ടുണ്ട്.
“ഭാവിയിലെ വിദ്യാഭ്യാസം എ.ഐ ഉപയോഗിക്കുന്നതിൽ മാത്രം ഒതുങ്ങരുത്; മറിച്ച് എ.ഐ സമൂഹത്തെ എങ്ങനെ സ്വാധീനിക്കും എന്ന് മനസ്സിലാക്കി ഉത്തരവാദിത്വത്തോടെ ഉപയോഗിക്കാൻ വിദ്യാർത്ഥികളെ തയ്യാറാക്കണം” എന്ന് ഡോ. നികിത ഹരി ട്രൂ വിഷൻ ന്യൂസിനോട് പറഞ്ഞു. എഞ്ചിനീയറിംഗ് വിദ്യാഭ്യാസം സമൂഹമാറ്റത്തിനും സുസ്ഥിര ഭാവിക്കും വഴിയൊരുക്കുന്ന ശക്തിയാണെന്നും അവർ പല വേദികളിലും വ്യക്തമാക്കിയിട്ടുണ്ട്.
ഗൂഗിളിന്റെ ഹയർ എഡ്യൂക്കേഷൻ ഫാക്കൽറ്റി എ.ഐ ഫെല്ലോഷിപ്പും ലോകമെമ്പാടുമുള്ള ഉയർന്ന വിദ്യാഭ്യാസ സ്ഥാപനങ്ങളിൽ എ.ഐ അധിഷ്ഠിത പഠന നവീകരണങ്ങൾ മുന്നോട്ട് കൊണ്ടുപോകുന്ന അധ്യാപകരെ ആദരിക്കുന്ന അന്താരാഷ്ട്ര പദ്ധതിയാണ്. അതേസമയം അഡ്വാൻസ് ഹയർ എഡ്യൂക്കേഷൻ സീനിയർ ഫെല്ലോഷിപ്പും ഉയർന്ന വിദ്യാഭ്യാസ രംഗത്ത് ദീർഘകാല അധ്യാപന-നേതൃത്വ മികവ് തെളിയിച്ചവർക്കുള്ള പ്രധാന അംഗീകാരങ്ങളിലൊന്നായി കണക്കാക്കപ്പെടുന്നു.
