സ്ത്രീത്വത്തെ അപമാനിച്ചെന്ന പരാതി; നടൻ ശ്രീനാഥ് ഭാസിക്കെതിരെ കേസെടുത്തു, ഉടനെ ചോദ്യം ചെയ്യും
കൊച്ചി: സ്ത്രീത്വത്തെ അപമാനിച്ചെന്ന കാരണത്താൽ നടൻ ശ്രീനാഥ് ഭാസിക്കെതിരെ പൊലീസ് കേസെടുത്തു. മരട് പൊലീസാണ് താരത്തിനെതിരെ കേസ് രജിസ്റ്റർ ചെയ്തത്. അഭിമുഖത്തിനിടെ അസഭ്യം പറഞ്ഞ് അപമാനിച്ചുവെന്ന ഓൺലൈൻ മാധ്യമപ്രവർത്തകയുടെ പരാതിയിലാണ് താരത്തിനെതിരെ കേസെടുത്തിരിക്കുന്നത്. കൊച്ചിയിൽ ചട്ടമ്പി എന്ന സിനിമയുടെ പ്രൊമോഷനുമായി ബന്ധപ്പെട്ട അഭിമുഖത്തിനിടെയാണ് സംഭവമുണ്ടായതെന്നും പരാതിക്കാരി മൊഴിയിൽ പറഞ്ഞു. പരാതിയിൽ ശ്രീനാഥ് ഭാസിയെ ഉടൻ ചോദ്യം ചെയ്യുമെന്ന് മരട് പൊലീസ് അറിയിച്ചു.
സിനിമയുടെ പ്രൊമോഷന്റെ ഭാഗമായി നടത്തിയ അഭിമുഖത്തിനിടെ നടൻ തന്നെ അധിക്ഷേപിച്ചെന്നും, ഭീഷണിപ്പെടുത്തിയെന്നും തെറി വിളിച്ചു എന്നുമാണ് മാധ്യമപ്രവർത്തക പരാതി നൽകിയിരുന്നത്. ഇന്നലെയായിരുന്നു കേസിന് ആസ്പദമായ സംഭവങ്ങൾ അരങ്ങേറിയത്. മരട് പൊലീസിലും വനിത കമ്മീഷനിലും നടനെതിരെ മാധ്യമപ്രവർത്തക പരാതി നൽകിയിരുന്നു. ക്ഷമ പറയാൻ വേണ്ടി ശ്രീനാഥ് ഭാസി വിളിച്ചപ്പോൾ ഈ മാധ്യമപ്രവർത്തക അധിക്ഷേപിച്ചെന്നാണ് സിനിമപ്രവർത്തകർ ആരോപിക്കുന്നത്.
ശ്രീനാഥ് ഭാസിയുടെ കരിയറിലെ ആദ്യ സോളോ ഹീറോ ചിത്രമാണ് ഇത്. ചെമ്പൻ വിനോദ് ജോസ്, ഗുരു സോമസുന്ദരം, ബിനു പപ്പു, ഗ്രേസ് ആന്റണി, മൈഥിലി എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. കഴിഞ്ഞ ദിവസങ്ങളിലൊക്കെയായി സിനിമയുടെ പ്രൊമോഷൻ തിരക്കുകളിലായിരുന്നു താരം.
