മുള്ളന്കൊല്ലി: വയനാട്ടില് അപകടമുണ്ടാക്കിയ ശേഷം നിര്ത്താതെ പോയ സ്കൂട്ടറില് നിന്ന് കഞ്ചാവ് പിടിച്ചെടുത്തു. പുല്പ്പള്ളി മുള്ളന്കൊല്ലിയിലാണ് സംഭവം നടന്നത്. സംഭവത്തില് മാനന്തവാടി താഴയങ്ങാടി കിഴക്കേതില് ബിനോയി (21), പനമരം കാരപ്പറമ്പില് അശ്വിന് (22) എന്നിവരെ അറസ്റ്റു ചെയ്തത് . നിര്ത്താതെ പോയ സ്കൂട്ടര് പിടികൂടി വിശദമായി പരിശോധിച്ചപ്പോഴാണ് ഒളിപ്പിച്ച് വച്ച അരക്കിലോയോളം കഞ്ചാവ് കണ്ടെത്തിയത്.
കേരള – കര്ണാടക അതിര്ത്തിയായ പെരിക്കല്ലൂര് ഭാഗത്തുനിന്ന് കഞ്ചാവുമായി വരികയായിരുന്നു ഇവർ. ഇവര് സഞ്ചരിച്ച കെ.എല്. 72 സി. 8671 നമ്പര് സ്കൂട്ടറും പൊലീസ് കസ്റ്റഡിയിലെടുത്തിരിക്കുകയാണ് . അപകടമുണ്ടായിട്ടും വാഹനം നിര്ത്താന് യുവാക്കള് തയ്യാറാകാതെ വന്നതോടെ നാട്ടുകാര് സ്കൂട്ടര് പിന്തുടരുകയായിരുന്നു.
ഇതിനകം തന്നെ വിവരം പൊലീസിലും അറിയിച്ചിരുന്നു. തുടര്ന്ന് മുള്ളന്കൊല്ലിയില്വെച്ച് പൊലീസും നാട്ടുകാരും ചേര്ന്ന് സ്കൂട്ടര് പിടികൂടുകയായിരുന്നു . വിശദമായ പരിശോധനയിലാണ് 495 ഗ്രാം കഞ്ചാവ് കണ്ടെടുത്തത്. പുല്പ്പള്ളി അഡി. എസ്.ഐ പി.ജി. സാജന്, എ.എസ്.ഐ പ്രദീപ്, സി.പി.ഒ.മാരായ പ്രജീഷ്, സുരേഷ് ബാബു, അസീസ്, സുമേഷ് എന്നിവരടങ്ങുന്ന സംഘമാണ് കഞ്ചാവ് പിടികൂടിയത്.
