ഇന്സ്റ്റാഗ്രാം വഴി യുവതികളുമായി സൗഹൃദം സ്ഥാപിച്ച് ലൈംഗിക ചുഷണവും കവര്ച്ചയും; യുവാവ് പിടിയില്
കൊടുവള്ളി: ഇന്സ്റ്റാഗ്രാം വഴി യുവതികളുമായി സൗഹൃദം സ്ഥാപിച്ച് ലൈംഗിക ചുഷണത്തിനിരയാക്കുകയും സ്വര്ണ്ണാഭരണം കവരുകയും ചെയ്ത വയനാട് സ്വദേശിയെ കൊടുവള്ളി പോലീസ് അറസ്റ്റ് ചെയ്തു. വയനാട് തരുവണ പരിയാരമുക്ക് വൈശ്യാല് വീട്ടില് മുക്താര്(23) ആണ് പിടിയിലായത്.
കൊടുവള്ളി സ്വദേശിനിയായ യുവതിയെ കബളിപ്പിച്ച് ഒരു പവന് സ്വര്ണ്ണാഭരണം കവര്ന്നുവെന്ന പരാതിയില് കൊടുവള്ളി പോലീസ് നടത്തിയ അന്വേഷണത്തിലാണ് പ്രതി പിടിയിലായത്. സാമ്പത്തിക പരാധീനതകളുള്ള യുവതികളെ കണ്ടെത്തി സൗഹൃദം സ്ഥാപിക്കുകയും ലൈംഗികമായി ചൂഷണം ചെയ്ത ശേഷം സ്വര്ണ്ണാഭരണം കവര്ച്ച ചെയ്യുകയുമാണ് പ്രതിയുടെ രീതിയെന്ന് പോലീസ് പറഞ്ഞു. കൊടുവള്ളി സ്വദേശിനിയുടെ ഒരു പവണ് സ്വര്ണ്ണാഭരണമാണ് പ്രതി കൈക്കലാക്കിയത്. ഇത് വില്പ്പന നടത്തിയ കല്പ്പറ്റയിലെ ജ്വല്ലറിയില് നിന്ന് പോലീസ് കസ്റ്റഡിയിലെടുത്തു.
നേരത്തെ വയനാട് അമ്പലവയലിലെ വിധവയോടും മകളോടും സൗഹൃദം സ്ഥാപിച്ച് വീട്ടിലെത്തിയ പ്രതി നാലര പവന് സ്വര്ണ്ണവും മൊബൈല് ഫോണും അപഹരിച്ചിരുന്നു. പാലക്കാട്, മലപ്പുറം ജില്ലകളിലും സമാന രീതിയില് നിരവധി യുവതികള് തട്ടിപ്പിനിരയായിട്ടുണ്ടെന്ന് കേസന്വേഷണത്തിന് നേതൃത്വം നല്കുന്ന കൊടുവള്ളി ഇന്സ്പെക്ടര് പി ചന്ദ്രമോഹന് പറഞ്ഞു. എസ് ഐ മാരായ അനൂപ് അരീക്കര, ബേബി മാത്യു, സീനിയര് സി പി ഒ മാരായ ലിനീഷ്, ഷഫീഖ് നീലിയാനിക്കല്, ഡ്രൈവര് ജനീഷ് എന്നിവരടങ്ങിയ സംഘമാണ് കേസന്വേഷിക്കുന്നത്.
