തീയറ്ററുകള് തുറക്കുന്ന തീരുമാനത്തില് നിന്ന് പിന്നോട്ടില്ലെന്ന് മന്ത്രി സജി ചെറിയാന്; തീയറ്റര് ഉടമകളുടെ ആവശ്യങ്ങള് പരിഗണിക്കും
സംസ്ഥാനത്ത് തീയറ്ററുകള് തുറക്കുന്ന തീരുമാനത്തില് നിന്ന് പിന്നോട്ടില്ലെന്ന് മന്ത്രി സജി ചെറിയാന്. തീയറ്ററുകളില് തിരക്ക് ഒഴിവാക്കാനുള്ള സംവിധാനമുണ്ടാക്കും. theatre reopen kerala തീയറ്റര് ഉടമകളോട് അനുഭാവപൂര്ണമായ സമീപനമാണ് സര്ക്കാരിന്റേത്. അവരുടെ ആവശ്യങ്ങള് പരിഗണിക്കുമെന്നും മന്ത്രി സജി ചെറിയാന് saji cherian ട്വന്റിഫോറിനോട് പറഞ്ഞു.
‘രണ്ട് വര്ഷമായി സംസ്ഥാനത്തിന്റെ ഉത്പാദന മേഖല വലിയ പ്രതിസന്ധിയാണ് നേരിടുന്നത്. പതിനായിരക്കണക്കിന് തൊഴിലാളികളുടെ ജീവിതവും പ്രതിസന്ധിയിലാണ്. ഐഎംഎയുടെ അഭിപ്രായം ശാസ്ത്രീയമായി ശരിയായിരിക്കാം. അതിനാലാണ് പ്രോട്ടോക്കോള് പാലിച്ച് നിബന്ധനകളുടെ അടിസ്ഥാനത്തില് തീയറ്റര് തുറക്കാന് തീരുമാനിച്ചത്.
അനന്തമായി തീയറ്ററുകള് ഉള്പ്പെടെ അടച്ചിടാന് സാധിക്കില്ല. ആര്ക്കും ബുദ്ധിമുട്ടില്ലാത്ത രീതിയില് സംവിധാനങ്ങള് ഒരുക്കും. വിനോദ നികുതി ഉള്പ്പെടെ സിനിമാ മേഖലയില് എല്ലാ വിഭാഗങ്ങള്ക്കും ആശങ്കയുണ്ട്.അതെല്ലാം ബന്ധപ്പെട്ട വകുപ്പുകള് പരിശോധിച്ച് തീരുമാനമെടുക്കും’. മന്ത്രി പറഞ്ഞു.
തീയറ്റര് തുറക്കുന്നത് സംബന്ധിച്ച സര്ക്കാര് തീരുമാനത്തെ എതിര്ത്ത് ഇന്ത്യന് മെഡിക്കല് അസോസിയേഷന് രംഗത്തെത്തിയിരുന്നു. അതേസമയം തീയറ്റര് തുറക്കലുമായി ബന്ധപ്പെട്ട് കൂടുതല് ചര്ച്ചകള് വേണമെന്ന് ഒരു വിഭാഗം തീയറ്റര് ഉടമകള് ആവശ്യപ്പെടുകയും ചെയ്തിട്ടുണ്ട്. രണ്ട് ഡോസ് വാക്സിന് എന്ന നിലപാട് തിരിച്ചടിയാകുമെന്നാണ് വിലയിരുത്തല്. വിനോദ നികുതി ഒഴിവാക്കണമെന്നും ആവശ്യം ഉയരുന്നുണ്ട്. സെക്കന്ഡ് ഷോയുടെ കാര്യത്തില് വ്യക്തത വേണമെന്നും, തീയറ്റര് തുറക്കല് അതിന് ശേഷം മതിയെന്നുമാണ് ഒരു വിഭാഗത്തിന്റെ ആവശ്യം.
ഈ മാസം 25 മുതലാണ് സംസ്ഥാനത്ത് സിനിമാ തീയറ്ററുകള് തുറക്കുക. പകുതി സീറ്റുകളില് മാത്രം പ്രവേശനം അനുവദിച്ചുകൊണ്ടായിരിക്കും തീയറ്ററുകളുടെ പ്രവര്ത്തനം. എ.സി പ്രവര്ത്തിപ്പിക്കാന് അനുമതി നല്കിയതിലും ഐഎംഎ എതിര്പ്പറിയിച്ചിട്ടുണ്ട്.
