കൊച്ചി : നടനും എംഎല്എയുമായ മുകേഷിനെതിരെ തൃശൂര് വടക്കാഞ്ചേരിയിലും കേസ്. ഐപിസി 354, 294 ബി വകുപ്പുകള് പ്രകാരമാണ് കേസെടുത്തിരിക്കുന്നത്. വടക്കാഞ്ചേരിക്കടുത്തുള്ള ഹോട്ടലില് വച്ച് മുകേഷ് അപമര്യാദയായി പെരുമാറി എന്ന പരാതിയിലാണ് കേസ്. 2011 ലാണ് കേസിന് ആസ്പദമായ സംഭവം നടന്നത്. മൂന്നുവര്ഷം വരെ ശിക്ഷ ലഭിക്കാവുന്ന കുറ്റമാണ് ചുമത്തിയത്. നോട്ടീസ് നല്കി മുകേഷിനെ വിളിപ്പിക്കുമെന്നും കേസിന്റെ തുടര് നടപടികള് പ്രത്യേക അന്വേഷണ സംഘവുമായി ആലോചിച്ച ശേഷമെടുക്കുമെന്നും പൊലീസ് പറഞ്ഞു.
യുവ നടിയുടെ പരാതിയില് മരട് പൊലീസ് നേരത്തെ മുകേഷിനെതിരെ കേസെടുത്തിട്ടുണ്ട്. കഴിഞ്ഞ 26ാം തീയതിയാണ് മുകേഷടക്കം സിനിമാ മേഖലയിലെ ഏഴ് പേര്ക്കെതിരെ ആരോപണം ഉന്നയിച്ചത്. പിന്നീട് ഇമെയില് മുഖേന പ്രത്യേക അന്വേഷണ സംഘത്തിന് പരാതി നല്കുകയായിരുന്നു. തുടര്ന്ന് മുകേഷടക്കമുള്ളവര്ക്കെതിരെ കേസെടുക്കുകയായിരുന്നു. നടിയുടെ മൊഴിയുടെ അടിസ്ഥാനത്തില് ഐപിസി 354 പ്രകാരമാണ് കേസെടുത്തിരിക്കുന്നത്.
തുടര്ന്ന് സിപിഐയിലെ മുതിര്ന്ന നേതാക്കളും പ്രതിപക്ഷവും വനിതാ സംഘടനകളുമെല്ലാം മുകേഷിന്റെ രാജി ആവശ്യപ്പെട്ട് രംഗത്ത് വന്നിരുന്നു. എന്നാല് മുകേഷ് രാജിവെക്കേണ്ടതില്ലെന്ന തീരുമാനത്തിലുറച്ച് നില്ക്കുകയാണ് സിപിഐഎം. ആരോപണങ്ങളുടെ അടിസ്ഥാനത്തില് മുകേഷ് രാജിവെക്കേണ്ടതില്ലെന്നാണ് പാര്ട്ടി നിലപാട്.
