കരിമ്പ സദാചാര ആക്രമണം:റിപ്പോര്ട്ട് തേടി സിഡബ്ല്യുസി,പൊലീസ് ആദ്യം ഒത്തുതീർപ്പിന് ശ്രമിച്ചെന്ന് മാതാപിതാക്കള്
പാലക്കാട്: കരിമ്പയിൽ വിദ്യാർത്ഥികൾക്കു നേരെയുണ്ടായ സദാചാര ആക്രമണത്തിൽ സിഡബ്ല്യുസി റിപ്പോര്ട്ട് തേടി. ഡിസ്ട്രിക്ട് ചൈല്ഡ്സ് പ്രൊട്ടക്ഷന് ഓഫീസറോടാണ് റിപ്പോര്ട്ട് ആവശ്യപ്പെട്ടത്. കുട്ടികള്ക്ക് നേരേ അതിക്രമം ഉണ്ടായെന്ന് ഉറപ്പായാല് സിഡബ്ല്യുസി കേസെടുക്കാന് നിര്ദേശം നല്കും. നാളത്തെ സിറ്റിംഗില് വിഷയം ചര്ച്ച ചെയ്യുമെന്ന് ചൈല്ഡ് വെല്ഫയര് കമ്മറ്റി ചെയര്മാന് എംവി മോഹനന് പറഞ്ഞു.
വിദ്യാർത്ഥികൾക്ക് നേരെയുണ്ടായ സദാചാര ആക്രമണത്തിൽ കേസുമായി മുന്നോട്ട് പോകാനാണ് മാതാപിതാക്കളുടെയും തീരുമാനം. പൊലീസ് തുടക്കത്തിൽ ഒത്തു തീർപ്പിന് ശ്രമിച്ചു. കുട്ടികൾക്ക് നേരെ ഇനിയും ആക്രമണം ഉണ്ടാകുമെന്ന് ഭയമുണ്ട്. കുട്ടികൾക്ക് പൊലീസ് സംരക്ഷണം നൽകണമെന്നും മാതാപിതാക്കൾ ഏഷ്യാനെറ്റ് ന്യൂസിനോട് പറഞ്ഞു. അതേസമയം അറസ്റ്റിലായ രണ്ടു പേരെയും സ്റ്റേഷൻ ജാമ്യത്തിൽ വിട്ടയച്ചു.
മണ്ണാർക്കാട് ബസ് സ്റ്റോപ്പില് ആൺകുട്ടികളും പെൺകുട്ടികളും ഒരുമിച്ചിരുന്നതിൻ്റെ പേരിലാണ് വിദ്യാർത്ഥികളെ നാട്ടുകാർ മർദ്ദിച്ചത്. മണ്ണാർക്കാട് കരിമ്പ എച്ച് എസ് എസ് ഹൈസ്ക്കൂളിലെ വിദ്യാർത്ഥികൾക്കാണ് മർദ്ദനമേറ്റത്. ബസ് സ്റ്റോപ്പില് ബസ് കാത്ത് ഇരിക്കുകയായിരുന്നു 5 പെൺകുട്ടികളും 5 ആൺകുട്ടികളും. ഈ സമയത്ത് അവിടേക്ക് വന്ന ഒരാൾ പെൺകുട്ടികൾക്കൊപ്പം ഇരിക്കുന്നത് ചോദ്യം ചെയ്തെന്നാണ് വിദ്യാർത്ഥികളുടെ പരാതി.
വിദ്യാർത്ഥിനികളെ അസഭ്യം പറയുകയും മർദ്ദിക്കാൻ തുനിയുകയും ചെയ്തു. ഇത് ചോദ്യം ചെയ്തപ്പോൾ നാട്ടുകാർ കൂട്ടം ചേർന്ന് മർദ്ദിക്കുകയായിരുന്നെന്ന് വിദ്യാർത്ഥികൾ പറയുന്നു. അധ്യാപകൻ്റെ മുന്നിലിട്ടാണ് കുട്ടികളെ തല്ലിച്ചതച്ചത്. തടയാൻ ശ്രമിച്ച അധ്യാപകനെ തള്ളി മാറ്റി. നാട്ടുകാർ കൂട്ടമായി എത്തിയാണ് മർദ്ദിച്ചതെന്ന് വിദ്യാർത്ഥികൾ പറഞ്ഞു. ആക്രമണത്തിന്റെ പേരിൽ വലിയ പ്രതിഷേധമാണ് ഉയരുന്നത്.
