തിരുവനന്തപുരം: 27-ാമത് ഐ.എഫ്.എഫ്.കെയ്ക്ക് തലസ്ഥാനത്ത് ഇന്ന് തുടക്കമാകും. ചലച്ചിത്ര മേള വൈകിട്ട് 3.30ന് നിശാഗന്ധി ഓഡിറ്റോറിയത്തില് മുഖ്യമന്ത്രി പിണറായി വിജയന് വിജയന് ഉദ്ഘാടനം ചെയ്യുന്ന ചടങ്ങിൽ സാംസ്കാരിക വകുപ്പ് മന്ത്രി വി.എന്.വാസവന് അധ്യക്ഷനാകും . ബ്രിട്ടീഷ് ഫിലിം ഇന്സ്റ്റിറ്റ്യൂട്ടിലെ റെസിഡന്റ് പിയാനിസ്റ്റ് ജോണി ബെസ്റ്റ് വിശിഷ്ടാതിഥിയാകും.
കൂടാതെ വേദിയിൽ ഇറാനില് സ്ത്രീകളുടെ അവകാശങ്ങള്ക്കുവേണ്ടി പൊരുതുന്ന സംവിധായിക മഹ്നാസ് മുഹമ്മദിക്ക് സ്പിരിറ്റ് ഓഫ് സിനിമ അവാര്ഡ് നല്കി മുഖ്യമന്ത്രി ആദരിക്കും. ഉദ്ഘാടനച്ചടങ്ങിനുശേഷം അഞ്ചു മണിക്ക് പുര്ബയന് ചാറ്റര്ജിയുടെ സിതാര് സംഗീതക്കച്ചേരി നടക്കും . സംഗീത പരിപാടിക്കുശേഷം ഉദ്ഘാടനചിത്രമായ ബെല്ജിയം, ഫ്രാന്സ് എന്നീ രാജ്യങ്ങളുടെ സംയുക്ത സംരംഭമായ ചിത്രം ടോറി ആന്റ് ലോകിത പ്രദര്ശിപ്പിക്കും.
ആഫ്രിക്കയില് ജനിച്ച് ബെല്ജിയം തെരുവുകളില് വളരുന്ന അഭയാര്ത്ഥികളായ ഒരു ആണ്കുട്ടിയുടെയും പെണ്കുട്ടിയുടെയും ആത്മബന്ധത്തിന്റെ കഥ പറയുന്ന ഈ ചിത്രം കഴിഞ്ഞ മെയില് നടന്ന കാന് ചലച്ചിത്രമേളയുടെ മല്സര വിഭാഗത്തില് പ്രദര്ശിപ്പിക്കുകയും കാന് 75-ാം വാര്ഷിക പുരസ്കാരം നേടുകയും ചെയ്ത. ഡിസംബര് 9 മുതല് 16 വരെ എട്ടു ദിവസങ്ങളിലായി നടക്കുന്ന മേളയില് 70 രാജ്യങ്ങളില്നിന്നുള്ള 186 സിനിമകള് പ്രദര്ശിപ്പിക്കും.
അന്താരാഷ്ട്ര മല്സരവിഭാഗത്തില് 14 സിനിമകളും മലയാള സിനിമ റ്റുഡേ വിഭാഗത്തില് 12 ചിത്രങ്ങളും ഇന്ത്യന് സിനിമ നൗ വിഭാഗത്തില് ഏഴ് സിനിമകളും പ്രദര്ശിപ്പിക്കും. കൂടാതെ ജര്മ്മന് സംവിധായകന് വീറ്റ് ഹെല്മര് ചെയര്മാനും ഗ്രീക്ക് ചലച്ചിത്രകാരി അതീന റേച്ചല് സംഗാരി, സ്പാനിഷ് – ഉറുഗ്വന് സംവിധായകന് അല്വാരോ ബ്രക്നര്, അര്ജന്റീനന് നടന് നഹൂല് പെരസ് ബിസ്കയാര്ട്ട്, ഇന്ത്യന് സംവിധായകന് ചൈതന്യ തംഹാനെ എന്നിവര് അംഗങ്ങളുമായ ജൂറിയാണ് അന്താരാഷ്ട്ര മല്സരവിഭാഗത്തിലെ മികച്ച സിനിമകള് തെരഞ്ഞെടുക്കുന്നത് ലോകസിനിമാ വിഭാഗത്തില് 78 സിനിമകള് പ്രദര്ശിപ്പിക്കും.
200 ഓളം ചലച്ചിത്രപ്രവര്ത്തകര് അതിഥികളായി പങ്കെടുക്കുന്ന മേളയില് 40 ഓളം പേര് വിദേശരാജ്യങ്ങളില്നിന്നുള്ളവരാണ്. 12 സിനിമകളുടെ ലോകത്തിലെ ആദ്യപ്രദര്ശനത്തിന് മേള വേദിയാവും. 14 തിയേറ്ററുകളിലായാണ് പ്രദര്ശനം നടക്കുക. 12000ത്തോളം ഡെലിഗേറ്റുകള് പങ്കെടുക്കും.
മികച്ച ചിത്രത്തിനുള്ള സുവര്ണ ചകോരത്തിന് അര്ഹമാവുന്ന സിനിമയ്ക്ക് 20 ലക്ഷം രൂപയും രജത ചകോരത്തിന് അര്ഹനാവുന്ന മികച്ച സംവിധായകന് നാലു ലക്ഷം രൂപയും രജതചകോരത്തിന് അര്ഹനാവുന്ന മികച്ച നവാഗത സംവിധായകന് മൂന്നു ലക്ഷം രൂപയും ലഭിക്കും.
കൂടാതെ പ്രേക്ഷകപുരസ്കാരത്തിന് അര്ഹമാവുന്ന സിനിമയുടെ സംവിധായകന് രണ്ടു ലക്ഷം രൂപയും കെ.ആര്.മോഹനന് എന്ഡോവ്മെന്റ് അവാര്ഡിന് അര്ഹനാവുന്ന ഇന്ത്യയിലെ മികച്ച നവാഗത സംവിധായകന് ഒരു ലക്ഷം രൂപയും ലഭിക്കും. അതിനു പുറമെ .ജര്മ്മനിയിലെ ചലച്ചിത്ര നിരൂപക കാതറിന ഡോക്ഹോണ് ചെയര്പേഴ്സണ് ആയ ജൂറി ഫിപ്രസ്കി അവാര്ഡുകളും ഇന്ദു ശ്രീകെന്ത് ചെയര്പേഴ്സണ് ആയ ജൂറി നെറ്റ്പാക് അവാര്ഡുകളും എന്. മനു ചക്രവര്ത്തി ചെയര്മാന് ആയ ജൂറി എഫ്.എഫ്.എസ്.ഐ കെ.ആര്. മോഹനന് അവാര്ഡുകളും നിര്ണയിക്കും.
