ബ്ലോക്ക് പഞ്ചായത്ത് തെരഞ്ഞെടുപ്പിൽ കൂറുമാറി ലീഗ് സ്വതന്ത്രൻ; വോട്ടിന് എൽഡിഎഫ് 50 ലക്ഷം വാഗ്ദാനം ചെയ്തതായി വെളിപ്പെടുത്തൽ
തൃശൂർ: വടക്കാഞ്ചേരിയിൽ ലീഗ് സ്വതന്ത്രൻ എൽഡിഎഫിന് ബ്ലോക്ക് പഞ്ചായത്ത് പ്രസിഡൻറ് തെരഞ്ഞെടുപ്പിൽ വോട്ട് ചെയ്യാൻ 50 ലക്ഷം രൂപ വാഗ്ദാനം ചെയ്തുവെന്ന് ആരോപണം.
ലീഗ് സ്വതന്ത്രനായി മത്സരിച്ച ജാഫർ മാസ്റ്ററുടെ പേരിലുള്ള ശബ്ദരേഖ പുറത്തുവന്നു. തനിക്ക് പണം ഓഫർ ചെയ്തിട്ടുണ്ടെന്ന് ജാഫർ കോൺഗ്രസ് വരവൂർ മണ്ഡലം പ്രസിഡന്റ് മുസ്തഫയോട് സംസാരിച്ച സംഭാഷണം എന്ന പേരിലാണ് ശബ്ദരേഖ പ്രചരിക്കുന്നത്.
‘എനിക്ക് 50 ലക്ഷത്തിന്റെ ഒരു ഓഫർ കിട്ടിയിട്ടുണ്ട്, ലൈഫ് സെറ്റിൽ ആക്കാനാണ് ഞാൻ ജീവിക്കുന്നത്..’ മുസ്തഫയുടെ ശബ്ദരേഖയില് പറയുന്നു. ഇന്ന് രാവിലെയാണ് ഫോണ് സംഭാഷണം പുറത്ത് വന്നത്.
അതേസമയം, ജാഫർ ചതിയ്ക്കുമെന്ന് പ്രതീക്ഷിച്ചിരുന്നില്ലെന്ന് കോൺഗ്രസ് വരവൂർ മണ്ഡലം പ്രസിഡന്റ് മുസ്തഫ മീഡിയവണിനോട് പറഞ്ഞു. ധൈര്യമുണ്ടെങ്കിൽ സിപിഎം ബ്ലോക്ക് പഞ്ചായത്ത് പ്രസിഡന്റ് സ്ഥാനം രാജിവെച്ച് തെരഞ്ഞെടുപ്പിനെ നേരിടണമെന്നും മുസ്തഫ പറഞ്ഞു. ഇക്കാര്യത്തില് ജാഫറിനെതിരെ നടപടിയുണ്ടാകും. ജാഫര് ഈ പണം സ്വീകരിക്കുമെന്ന് ഉറപ്പാണ്. മുസ്തഫ പറഞ്ഞു.
സംഭവത്തില് കോൺഗ്രസ് നേതാവും അടാട്ട് പഞ്ചായത്ത് പ്രസിഡന്റുമായ അനിൽ അക്കര വിജിലൻസിന് പരാതി നൽകി.
