Pathanamthitta
പാമ്പിനെ കണ്ട് വെട്ടിച്ചു, പത്തനംതിട്ടയിൽ സ്കൂൾ കുട്ടികളുമായി പോയ ഓട്ടോ തോട്ടിലേക്ക് മറിഞ്ഞ് അപകടം; ഒരു വിദ്യാർത്ഥി മരിച്ചു
പത്തനംതിട്ട : സ്കൂള് കുട്ടികളുമായി പോയ ഓട്ടോ തോട്ടിലേക്ക് മറിഞ്ഞ് ഒരു വിദ്യാര്ഥിനി മരിച്ചു. പത്തനംതിട്ട കരുമാൻതോട് ശ്രീനാരായണ സ്കൂളിലെ വിദ്യാര്ഥിനി ഭാഗ്യലക്ഷ്മി(9)യാണ് മരിച്ചത്. പത്തനംതിട്ട തൂമ്പാക്കുളത്ത് ബുധനാഴ്ച വൈകീട്ടായിരുന്നു അപകടം.
നാലുമണിക്ക് സ്കൂള്വിട്ടശേഷം വിദ്യാര്ഥികളുമായി പോവുകയായിരുന്ന ഓട്ടോയാണ് അപകടത്തില്പ്പെട്ടത്. റോഡില് കണ്ട പാമ്പിനെ വെട്ടിച്ചപ്പോള് ഓട്ടോ തോട്ടിലേക്ക് മറിഞ്ഞെന്നാണ് വിവരം. ഡ്രൈവറും അഞ്ചുകുട്ടികളുമാണ് വാഹനത്തിലുണ്ടായിരുന്നത്. ഇതില് ഒരു കുട്ടിയാണ് മരിച്ചത്.
പരിക്കേറ്റ ഡ്രൈവറെയും മറ്റുകുട്ടികളെയും പത്തനംതിട്ടയിലെ ആശുപത്രിയില് പ്രവേശിപ്പിച്ചു. ഇതില് രണ്ടുകുട്ടികളുടെ തലയ്ക്കാണ് പരിക്ക്. ഒരാള്ക്ക് കൈയ്ക്കും പരിക്കുണ്ട്. ആവശ്യമെങ്കില് പരിക്കേറ്റവരെ കോട്ടയം മെഡിക്കല് കോളേജ് ആശുപത്രിയിലേക്ക് മാറ്റും.
