Idukki
വീടിന് സമീപത്തെ കൊക്കോ മരത്തില്‍ രാജവെമ്പാല, വനം വകുപ്പ് അധികൃതരെത്തി പാമ്പിനെ പിടികൂടി കാട്ടില്‍ വിട്ടു
ഇടുക്കി: നാടുകാണി ഭാഗത്ത് നിന്നും രാജവെമ്പാലയെ പിടികൂടി. വെട്ടിലമ്പാറയില്‍ മീനാക്ഷി തങ്കപ്പന്‍റെ വീടിനടുത്തുള്ള കൊക്കോ മരത്തില്‍ നിന്നുമാണ് പാമ്പിനെ പിടികൂടിയത്. വൈകിട്ട് വീട്ടിലെ കോഴികള്‍ ഈ കൊക്കോയിലാണ് കയറിയിരിക്കുന്നത്.
കോഴികള്‍ ഒച്ചവെയ്ക്കുന്നത് കേട്ട് നോക്കിയപ്പോള്‍ ആണ് പാമ്പിനെ കണ്ടത്. പാമ്പിനെ കണ്ട ഉടന്‍ തന്നെ വനം വകുപ്പ് അധികൃതരെ വിവരം അറിയിച്ചു. അവര്‍ എത്തിയാണ് പാമ്പിനെ പിടിച്ചത്. 15 കിലോ തൂക്കവും നാല് മീറ്റര്‍ നീളവുമുണ്ട് പാമ്പിന്.മൂലമറ്റം ഫോറസ്റ്റര്‍ എ ജി സുനില്‍കുമാര്‍ (ഡി വൈ ആര്‍ എഫ് ഒ), അഖില്‍ സജീവന്‍ (ബി എഫ് ഒ), സിസിലി ജോണ്‍ (എഫ്,ഡബ്ല്യു ), വിനോദ് (സ്‌നാക്ക് വാച്ചര്‍) എന്നിവര്‍ എത്തിയാണ് പാമ്പിനെ പിടികൂടിയത്. ഇടുക്കി മീന്‍മ്മുട്ടി വനത്തില്‍ പാമ്പിനെ തുറന്നു വിട്ടു.
