താമരശ്ശേരി: പൂനൂരിൽ നിയന്ത്രണം വിട്ട കാർ ബസ് കാത്തിരിപ്പ് കേന്ദ്രത്തിലേക്ക് ഇടിച്ചുകയറിയുണ്ടായ അപകടത്തിൽ കട്ടിപ്പാറ സ്വദേശിനിയായ യുവതിക്ക് ഗുരുതരമായി പരിക്കേറ്റു. കട്ടിപ്പാറ ഇരൂൾ കുന്നുമ്മൽ സ്വദേശിനി ദിദുന റാം (27) ആണ് പരിക്കേറ്റത്. സംഭവത്തെ തുടർന്ന് ഗുരുതര പരിക്കേറ്റ ഇവരെ ഉടൻതന്നെ ഓമശ്ശേരിയിലെ സ്വകാര്യ ആശുപത്രിയിൽ പ്രവേശിപ്പിച്ച് തീവ്രപരിചരണം നൽകിവരികയാണെന്ന് ബന്ധപ്പെട്ടവർ വ്യക്തമാക്കി.
രാവിലെ 9.15ഓടെയാണ് നാടിനെ ഞെട്ടിച്ച ഈ അപകടം ഉണ്ടായത്. ഈ സമയം ബസ് കാത്തിരിപ്പ് കേന്ദ്രത്തിൽ നിരവധി യാത്രക്കാർ ഉണ്ടായിരുന്നെങ്കിലും, അപകടത്തിന് തൊട്ടുമുമ്പ് ഇവർ ബസിൽ കയറി പോയതിനാൽ വലിയൊരു ദുരന്തമാണ് ഒഴിവായതെന്ന് ദൃക്സാക്ഷികൾ പറഞ്ഞു. ബാലുശ്ശേരി ഭാഗത്തുനിന്ന് എത്തിയ കാർ അപകടസ്ഥലത്തിന് ഏറെ ദൂരം മുമ്പുതന്നെ തെറ്റായ ദിശയിലൂടെയാണ് സഞ്ചരിച്ചിരുന്നതെന്നാണ് പ്രാഥമിക വിവരമെന്ന് നാട്ടുകാർ അറിയിച്ചു.
നിയന്ത്രണം വിട്ട കാർ വേഗതയിൽ വന്ന് ബസ് കാത്തിരിപ്പ് കേന്ദ്രത്തിലേക്ക് ഇടിച്ചുകയറിയതോടെ കെട്ടിടം പൂർണമായും തകർന്നു തരിപ്പണമായി. കാർ വരുന്നതുകണ്ട് ബസ് കാത്തിരിപ്പ് കേന്ദ്രത്തിലുണ്ടായിരുന്ന മറ്റ് ഏതാനും പേർ പെട്ടെന്ന് തന്നെ ഓടിമാറി രക്ഷപ്പെടുകയായിരുന്നു. സംഭവത്തെ തുടർന്ന് പ്രദേശത്ത് ചെറിയ തോതിൽ ഗതാഗത തടസ്സവും ആശങ്കയും പരന്നിരുന്നു.