വടകര : സ്കൂൾ വിദ്യാർഥിനിയെ നിരന്തരം ലൈംഗിക അതിക്രമത്തിന് ഇരയാക്കിയ മധ്യവയസ്കൻ പൊലീസിന്റെ പിടിയിൽ. ചോറോട് മുട്ടുങ്ങൽ സ്വദേശി കരക്കെട്ടിന്റവിട കരീമിനെയാണ് (55) വടകര പൊലീസ് അറസ്റ്റ് ചെയ്തത്. ഇയാൾ ബധിരനും മൂകനുമാണ്.
ഇക്കഴിഞ്ഞ ഫെബ്രുവരി മുതൽ സെപ്റ്റംബർ വരെയുള്ള മാസങ്ങളിലാണ് പ്രതി വിദ്യാർഥിനിയെ പീഡനത്തിന് ഇരയാക്കിയത്. കുട്ടി സ്കൂളിൽ പോകുമ്പോഴും വരുമ്പോഴും കടയിലേക്ക് പോകുമ്പോഴുമെല്ലാം ഇയാൾ വഴിയിൽ തടഞ്ഞുനിർത്തി ലൈംഗിക അതിക്രമം നടത്തുകയായിരുന്നുവെന്ന് പൊലീസ് പറഞ്ഞു.
ശാരീരിക അസ്വസ്ഥതകളും പെരുമാറ്റത്തിലെ മാറ്റവും ശ്രദ്ധയിൽപ്പെട്ടതിനെ തുടർന്ന് വിവരമറിഞ്ഞ ബന്ധുക്കൾ നൽകിയ പരാതിയുടെ അടിസ്ഥാനത്തിലാണ് വടകര പൊലീസ് കേസെടുത്തത്. അറസ്റ്റ് ചെയ്ത പ്രതിയെ വടകര ജില്ലാ ആശുപത്രിയിൽ വൈദ്യപരിശോധനയ്ക്ക് വിധേയമാക്കിയ ശേഷം കോടതിയിൽ ഹാജരാക്കി റിമാൻഡ് ചെയ്തു.