തിരുവനന്തപുരം: കേരളത്തിന്റെ തദ്ദേശീയ മദ്യമായ ‘ജവാൻ റം’ എന്ന പേര് മാറ്റണമെന്ന ആവശ്യവുമായി പരാതി. കോഴിക്കോട് എലത്തൂർ സ്വദേശി റിട്ട. തഹസിൽദാർ രാജേന്ദ്രൻ നായരാണ് മുഖ്യമന്ത്രിക്ക് പരാതി നൽകിയത്.
“ജവാൻ” എന്ന പേര് രാജ്യത്തെ സൈനികരെ അപകീർത്തിപ്പെടുത്തുന്നതാണെന്നാണ് പരാതിയിലെ പ്രധാന ആക്ഷേപം. പേര് അപകീർത്തികരമല്ലെന്ന് നിർമ്മാതാക്കളായ ട്രാവൻകൂർ ഷുഗേഴ്സ് ആൻഡ് കെമിക്കൽസ് ലിമിറ്റഡ് മറുപടി നൽകി. 1937-ൽ പ്രവർത്തനം തുടങ്ങിയ കമ്പനിയാണിത്.
ഇന്ത്യൻ മിലിട്ടറി കാന്റീനുകളിൽ വരെ ഈ മദ്യം വിൽപ്പന നടത്തിയ ചരിത്രമുണ്ടെന്നും കമ്പനി വ്യക്തമാക്കി. നിർമ്മാതാക്കൾ നൽകിയ മറുപടി തൃപ്തികരമല്ലെന്നാണ് പരാതിക്കാരനായ രാജേന്ദ്രൻ നായരുടെ നിലപാട്. കേരള സ്റ്റേറ്റ് ബെവറേജസ് കോർപ്പറേഷൻ വഴി വിൽപ്പന നടത്തുന്ന ഏറ്റവും പഴക്കമുള്ള ബ്രാൻഡുകളിൽ ഒന്നാണ് ജവാൻ റം.