ചരിത്രത്തിലാദ്യമായി കാനഡ ഫിഫ ലോകകപ്പിന്റെ പ്രീ ക്വാര്ട്ടറില്. നോക്കൗട്ടില് ദക്ഷിണാഫ്രിക്കയെ ഏകപക്ഷീയമായ ഒരു ഗോളിന് തോല്പ്പിച്ചു. ഇഞ്ചുറി ടൈമില് സ്റ്റെഫാന് എസ്റ്റാക്യോയാണ് വിജയഗോള് നേടിയത്. ലോസ് ആഞ്ചലസില് ഇഞ്ചോടിഞ്ച് പോരാട്ടമാണ് ആദ്യ മിനിറ്റ് മുതല് കണ്ടത്. മത്സരത്തിന്റെ ഒന്നാം പകുതിയില് പന്തടക്കത്തില് ദക്ഷിണാഫ്രിക്ക മുന്നിട്ടുനിന്നപ്പോള്, മികച്ച മുന്നേറ്റങ്ങളുമായി കാനഡ പലതവണ ദക്ഷിണാഫ്രിക്കന് ഗോള്മുഖം വിറപ്പിച്ചു.
34-കാരനായ ക്യാപ്റ്റന് റോണ്വെന് വില്യംസിന്റെ നേതൃത്വത്തില് ദക്ഷിണാഫ്രിക്കന് പ്രതിരോധം കോട്ട കെട്ടി നിന്നപ്പോള് കാനഡയുടെ പല സുവര്ണ്ണ അവസരങ്ങളും പാഴായി. കനേഡിയന് സ്ട്രൈക്കര്മാരുടെ ഏഴോളം ഉറച്ച ഗോള്ശ്രമങ്ങളാണ് വില്യംസ് അവിശ്വസനീയമായ സേവുകളിലൂടെ തടഞ്ഞിട്ടത്. മത്സരത്തിന്റെ 75-ാം മിനിറ്റില് സൂപ്പര് താരം അല്ഫോണ്സോ ഡേവിസ് പകരക്കാരനായി കളത്തിലിറങ്ങിയതോടെ കനേഡിയന് ആക്രമണങ്ങള്ക്ക് മൂര്ച്ച കൂടി. മത്സരം അധികസമയത്തേക്ക് നീങ്ങുമെന്ന് ഉറപ്പിച്ചിരിക്കെയാണ് 92-ാം മിനിറ്റില് വിജയഗോള് പിറന്നത്. ബോക്സിന് തൊട്ടുപുറത്തുനിന്നും ലഭിച്ച പന്ത് മനോഹരമായ ഒരു വോളിയിലൂടെ മിഡ്ഫീല്ഡ് താരം സ്റ്റെഫാന് എസ്റ്റാക്യോ ദക്ഷിണാഫ്രിക്കന് വലയിലെത്തിച്ചു. ഒരു ഗോളിന്റെ ബലത്തോടെ ചരിത്രത്തിലാദ്യമായി കാനഡ ലോകകപ്പിന്റെ പ്രീക്വാര്ട്ടറിലേക്ക് യോഗ്യത നേടി. നെതര്ലന്ഡ്സ് – മൊറോക്കോ മത്സരത്തിലെ വിജയികളെയാണ് കാനഡ പ്രീക്വാര്ട്ടറില് നേരിടുക.