വാടകക്കൊലയാളികളെ ഉപയോഗിച്ച് മുൻ കാമുകനെ കൊലപ്പെടുത്തിയ 28 കാരി അറസ്റ്റിൽ. തമിഴ്നാട്ടിലെ പൊന്നേരിയിലാണ് സംഭവം. പൊന്നേരി സ്വദേശിയും രണ്ട് കുട്ടികളുടെ അമ്മയുമായ പ്രിയ(28)യാണ് അറസ്റ്റിലായത്. വാടകക്കൊലയാളികൾക്കായി പൊലീസ് തിരച്ചിൽ ആരംഭിച്ചു.
കൊറിയർ കമ്പനിയിൽ ജോലി ചെയ്തിരുന്ന ഗോപാലകൃഷ്ണൻ (27) ആണ് മരിച്ചത്. ഭർത്താവുമായി വേർപിരിഞ്ഞ് കഴിഞ്ഞിരുന്ന പ്രിയ, ഗോപാലകൃഷ്ണനുമായി അടുപ്പത്തിലായിരുന്നുവെന്ന് പൊലീസ് പറഞ്ഞു. പ്രിയയ്ക്ക് ആദ്യ വിവാഹത്തിൽ രണ്ട് കുട്ടികളുണ്ട്. എന്നാൽ യുവതി പതുക്കെ ഗോപാലകൃഷ്ണനിൽ നിന്ന് അകന്നു തുടങ്ങി. കഴിഞ്ഞ മാസമാണ് പ്രിയ യുവാവിൽ നിന്ന് പൂർണമായി അകന്നത്.
യുവതിക്ക് മറ്റൊരു പുരുഷനുമായി ബന്ധമുണ്ടെന്ന് അറിഞ്ഞ ഗോപാലകൃഷ്ണൻ പ്രിയയുമായി പതിവായി വഴക്കിടാറുണ്ടായിരുന്നു. പുതിയ ബന്ധം അവസാനിപ്പിക്കാനും ഇയാൾ ആവശ്യപ്പെടാൻ തുടങ്ങി. ശല്യം സഹിക്കവയ്യാതെ ഗോപാലകൃഷ്ണനെ കൊല്ലാൻ പ്രിയ തീരുമാനിച്ചു. ഇതിനായി നാല് വാടകക്കൊലയാളികളെ ഏർപ്പാടാക്കിയെന്നും പൊലീസ് പറയുന്നു.
മുൻകൂട്ടി നിശ്ചയിച്ച പ്രകാരം പ്രിയ ഗോപാലകൃഷ്ണനെ വിളിച്ച് നേരിട്ട് കാണണമെന്ന് ആവശ്യപ്പെട്ടു. ബുധനാഴ്ച പൊന്നേരി നഗരസഭാ ഓഫീസിന് സമീപം എത്താനാണ് ഗോപാലകൃഷ്ണന് പ്രിയ നൽകിയ നിർദ്ദേശം. രാത്രിയോടെ പ്രിയയെ കാണാൻ പുറപ്പെട്ട യുവാവിനെ വാടകക്കൊലയാളികൾ തട്ടികൊണ്ട് പോയി കൊലപ്പെടുത്തുകയുമായിരുന്നു.
പിന്നീട് രക്തത്തിൽ കുളിച്ചുകിടക്കുന്ന ഗോപാലകൃഷ്ണൻ്റെ മൃതദേഹം പൊലീസ് കണ്ടെത്തി. തുടർന്നുള്ള അന്വേഷണത്തിലാണ് കൊലപാതക വിവരം പുറത്തുവന്നത്.