കല്പ്പറ്റ: ഡോക്ടറാണെന്ന് തെറ്റിദ്ധരിപ്പിക്കുകയും സൗഹൃദം സ്ഥാപിച്ച് പണവും സ്വര്ണവും തട്ടുകയും ചെയ്ത യുവാവ് പിടിയില്. സുല്ത്താന് ബത്തേരി കൊളഗപ്പാറ താന്നിലോട് സ്വദേശി കിഴക്കേ വീട്ടില് സുരേഷ് (45) എന്നയാളെയാണ് തിരുവനന്തപുരത്ത് ഒളിച്ചു താമസിക്കവേ പൊലീസ് പൊക്കിയത്. താന് ഡോക്ടറാണെന്ന് പറഞ്ഞ് സ്ത്രീകളുമായി സൗഹൃദം സ്ഥാപിക്കുയും വീവാഹ വാഗ്ദാനം നല്കി സ്ത്രീകളുടെ പക്കല് നിന്നും പൈസയും സ്വര്ണവും കൈക്കലാക്കുകയുമായിരുന്നു ഇയാളുടെ രീതി. അപ്പോളോ, അമൃത തുടങ്ങിയ ആശുപത്രികളില് ഡോക്ടര് ആണെന്നായിരുന്നു ഇയള് അവകാശപ്പെട്ടിരുന്നത്.
ഡോക്ടര് സുരേഷ് കുമാര്, ഡോക്ടര് സുരേഷ് കിരണ്, ഡോക്ടര് കിരണ് കുമാര് എന്നിങ്ങനെ വിവിധ പേരുകളിലുമാണ് ഇയാള് ആളുകളെ കബളിപ്പിച്ചിരുന്നത്. വയനാട് സ്വദേശിനിയുടെ പരാതിയിലാണ് കല്പ്പറ്റ പൊലീസ് കേസ് രജിസ്റ്റര് ചെയ്ത്. കല്പ്പറ്റ എഎസ്പി തപോഷ് ബസുമധാരി ഐപിഎസിന്റെ നേതൃത്വത്തില് പ്രത്യേക അന്വേഷണ സംഘം രൂപീകരിച്ചാണ് അന്വേഷണം ആരംഭിച്ചത്.