ക്രിക്കറ്റ് പൂരത്തിനായി തിരുവനന്തപുരം ഒരുങ്ങി. ഇന്ത്യ-ശ്രീലങ്ക മൂന്നാം ഏകദിനം ഇന്ന് ഉച്ചയ്ക്ക് 1.30ന് കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടക്കും. ആദ്യ രണ്ട് കളിയും ജയിച്ച് പരമ്പര സ്വന്തമാക്കിയാണ് ഇന്ത്യ ഇറങ്ങുന്നത്. ഇതുകൊണ്ടുതന്നെ ഇന്ത്യൻ ടീമിൽ മാറ്റത്തിന് സാധ്യതയുണ്ട്. നാട്ടിലേക്ക് മടങ്ങും മുമ്പ് ആശ്വാസജയമാണ് ലങ്കയുടെ ലക്ഷ്യം. രാവിലെ പതിനൊന്നര മുതൽ കാണികളെ സ്റ്റേഡിയത്തിൽ പ്രവേശിപ്പിക്കും.
നാല് മാസത്തെ ഇടവേളയ്ക്ക് ശേഷമാണ് കാര്യവട്ടം ഒരു അന്താരാഷ്ട്ര ക്രിക്കറ്റ് മത്സരത്തിന് വേദിയാകുന്നത്. അവസാനം കാര്യവട്ടത്ത് ഇന്ത്യയോട് ഏറ്റുമുട്ടാനെത്തിയത് ദക്ഷിണാഫ്രിക്കയായിരുന്നു. സൂര്യകുമാർ യാദവിന്റെയും കെ എൽ രാഹുലിന്റേയും അർധ സെഞ്ചുറിയുടെ കരുത്തിൽ ട്വന്റി 20യിൽ ഇന്ത്യ ജയം എട്ട് വിക്കറ്റിന് വിജയിച്ചു. കൊല്ക്കത്ത ഏകദിനത്തില് മാച്ച് വിന്നിംഗ് അര്ധ സെഞ്ചുറിയുമായി രാഹുല് ഫോമിലാണ്.
ഇരു ടീമുകളും ജനുവരി 13ന് തിരുവനന്തപുരത്തെത്തിയിരുന്നു. ഇന്ത്യൻ ടീമിന് ഹയാത്ത് റീജൻസിയിലും ശ്രീലങ്കൻ ടീമിന് താജ് ഹോട്ടലിലുമാണ് സൗകര്യം താമസ സൗകര്യം ഒരുക്കിയിരുന്നത്. ഇന്നലെ ഇരുടീമുകളും ഗ്രീൻഫീൽഡ് സ്റ്റേഡിയത്തിൽ അവസാനഘട്ട പരീശീലനം നടത്തുകയും ചെയ്തു.