സീസണിന്റെ തുടക്കത്തിലെ തോൽവികളിൽ നിന്ന് കരകയറി തുടർച്ചയായ നാലാം വിജയം സ്വന്തമാക്കി കേരള ബ്ലാസ്റ്റേഴ്സിന്റെ തേരോട്ടം. കഴിഞ്ഞ വർഷത്തെ സെമി ഫൈനലിൽ ബ്ലാസ്റ്റേഴ്സ് തകർത്തുവിട്ട ജംഷഡ്പൂരിനെയാണ് കേരളം ഇന്ന് പരാജയപ്പെടുത്തിയത്. ആദ്യ പകുതിയുടെ പതിനേഴാം മിനിറ്റിൽ ദിമിത്രിയോസ് നേടിയ മിന്നും ഗോളിലൂടെയായിരുന്നു ബ്ലാസ്റ്റേഴ്സിന്റെ ജയം.
ക്യാപ്റ്റൻ അട്രിയാൻ ലൂണയാണ് വിജയ ഗോളിന് വഴിയൊരുക്കിയത്. ലൂണ എടുത്ത ഫ്രീ കിക്കിൽ നിന്നും ലഭിച്ച അവസരമാണ് ദിമിത്രിയോസ് ഗോളാക്കി മാറ്റിയത്. മത്സരത്തിലുടനീളം പന്ത് കൈവശം വെയ്ക്കുന്നതിൽ ആധിപത്യം സ്ഥാപിച്ച ബ്ലാസ്റ്റേഴ്സ് 64 ശതമാനം സമയവും കളി നിയന്ത്രിച്ചു.
11 ഷോട്ടുകൾ വീതം ഇരു ടീമുകളും ഗോൾ വല ലക്ഷ്യമാക്കി ഉതിർത്തു. ഒരേയൊരു തവണ മാത്രമാണ് ജംഷഡ്പൂർ ഷോട്ട് ഓൺ ടാർഗെറ്റിലേക്ക് പന്ത് പായിച്ചത്. കേരള ബ്ലാസ്റ്റേഴ്സ് തുടർച്ചയായി നാല് മത്സരങ്ങൾ ജയിക്കുന്നത് ആദ്യമായാണ്.