തിരുവനന്തപുരം ഗവ. മെഡിക്കല് കോളജും തിരുവനന്തപുരം ഗവ. ദന്തല് കോളജും ദേശീയ മെഡിക്കല് വിദ്യാഭ്യാസ റാങ്കിങ്ങില് മികച്ച സ്ഥാനങ്ങള് നേടി. ആദ്യമായാണ് കേരളത്തില് നിന്നുള്ള ഒരു സര്ക്കാര് മെഡിക്കല് കോളജ് ദേശീയ റാങ്കിങ്ങില് ഉള്പ്പെടുന്നത്.
ക്വാളിറ്റി ഇംപ്രൂവ്മെന്റ് ഇനിഷ്യേറ്റീവ് ഉള്പ്പെടെ ആവിഷ്കരിച്ച് പ്രവര്ത്തനങ്ങള് നടപ്പിലാക്കുന്നതിന് ഒപ്പം നിന്ന് പരിശ്രമിച്ച മെഡിക്കല് വിദ്യാഭ്യാസ വകുപ്പിലെ പ്രിയപ്പെട്ട എല്ലാ ടീം അംഗങ്ങള്ക്കും ആരോഗ്യ വകുപ്പ് മന്ത്രി വീണാ ജോര്ജ് നന്ദി അറിയിച്ചു.
തിരുവന്തപുരം മെഡിക്കല് കോളജ് നാല്പത്തിനാലാം സ്ഥാനത്തും ദന്തല് കോളജ് ഇരുപത്തിയഞ്ചാം സ്ഥാനത്തുമാണുള്ളത്. സംസ്ഥാനത്തെ മെഡിക്കല് വിദ്യാഭ്യാസ രംഗത്ത് കഴിഞ്ഞ രണ്ട് വര്ഷങ്ങള് കൊണ്ട് വലിയ പുരോഗതിയാണ് ഉണ്ടായതെന്ന് മന്ത്രി വീണാ ജോര്ജ് പറഞ്ഞു.
രണ്ട് മെഡിക്കല് കോളജുകളും രണ്ട് നഴ്സിംഗ് കോളേജുകളും യാഥാര്ത്ഥ്യമാക്കി. കരള്മാറ്റിവയ്ക്കല് ശസ്ത്രക്രിയ യാഥാര്ത്ഥ്യമാക്കി. മെഡിക്കല് കോളജുകളില് മാസ്റ്റര് പ്ലാനുകള് നടപ്പിലാക്കി മികവിന്റെ കേന്ദ്രങ്ങളാക്കി വരുന്നു. ഈ സര്ക്കാര് വന്ന ശേഷം 29 സ്പെഷ്യാലിറ്റി സീറ്റുകള്ക്കും 9 സൂപ്പര് സ്പെഷ്യാലിറ്റി സീറ്റുകള്ക്കും അനുമതി നേടിയെടുക്കാന് സാധിച്ചിട്ടുണ്ട്. ദന്തല് മേഖലയുടെ വികസനത്തിനായും വലിയ ഇടപെടലുകളാണ് നടത്തുന്നതെന്നും മന്ത്രി വ്യക്തമാക്കി.