തിരുവനന്തപുരം: ഓണാഘോഷ പരിപാടികളുടെ ഭാഗമായോ അല്ലാതെയോ വിദ്യാഭ്യാസ സ്ഥാപനങ്ങളിലോ പൊതു നിരത്തുകളിലോ വാഹനങ്ങളില് രൂപമാറ്റം വരുത്തി നിയമവിരുദ്ധ പരിപാടികള് സംഘടിപ്പിക്കുന്നത് നിരോധിച്ചതായി ട്രാന്സ്പോര്ട്ട് കമ്മീഷണര് അറിയിച്ചു. വാഹനങ്ങളില് അമിത ശബ്ദ വെളിച്ച സംവിധാനങ്ങള് ഘടിപ്പിച്ച് പരിപാടികള് സംഘടിപ്പിക്കുന്നതും വിലക്കിയിട്ടുണ്ട്.
വിദ്യാഭ്യാസ സ്ഥാപനങ്ങളില് ഇത്തരം നിയമ വിരുദ്ധമായ അഭ്യാസ പ്രകടനങ്ങള് നടക്കുന്നില്ലെന്ന് സ്കൂള് അധികൃതര് ഉറപ്പാക്കണം. കുട്ടികളുടെ സുരക്ഷയെ കരുതി മാതാപിതാക്കളും ഇവരുടെ വാഹന ഉപയോഗം നിരീക്ഷിക്കണം. ഇത്തരം സംഭവങ്ങള് ശ്രദ്ധയില്പ്പെട്ടാല് പൊതുജനങ്ങള്ക്ക് വിവരം നല്കാവുന്നതാണ്. ഫോട്ടോ/ വീഡിയോ സഹിതം അതാത് എന്ഫോഴ്സ്മെന്റ് ആര്ടിഒ മാരെ വിവരം അറിയിക്കണമെന്നും മൊബൈല് നമ്പര്, ഇ-മെയില് വിലാസം എന്നിവ മോട്ടോര് വാഹന വകുപ്പിന്റെ വെബ് സൈറ്റില് ലഭ്യമാക്കണമെന്നും കമ്മിഷന് അറിയിച്ചു.