തിരുവനന്തപുരം: സ്ത്രീധനത്തിന്റെ പേരിൽ യുവതിയെയും ഒന്നരവയസുള്ള കുഞ്ഞിനെയും ക്രൂരമായി മർദ്ദിച്ച സംഭവത്തിൽ ഭർതൃകുടുംബത്തിനെതിരെ പൊലീസ് കേസെടുത്തു. തിരുവനന്തപുരം ശ്രീകാര്യം സ്വദേശികളായ ഭർത്താവും ഭർതൃമാതാവുമാണ് കേസിലെ പ്രതികൾ.
പൗഡിക്കോണം പനവിള സ്വദേശി ഷൈജു(40), മാതാവ് തങ്കമണി(62) എന്നിവർക്കെതിരെയാണ് ശ്രീകാര്യം പൊലീസ് കേസ് രജിസ്റ്റർ ചെയ്തത്. ഉളിയാഴ്തുറ ചെമ്പഴന്തി എ.കെ നഗർ ശോഭാഭവനിൽ താമസിക്കുന്ന അശ്വതി(32) ആണ് മർദ്ദനത്തിന് ഇരയായത്.
വിവാഹത്തിന് നൽകിയ സ്വർണാഭരണങ്ങളും രണ്ടു ലക്ഷം രൂപയും കുറഞ്ഞുപോയെന്ന് ആരോപിച്ചാണ് ഷൈജു നിരന്തരം ഭാര്യയെ മർദ്ദിച്ചിരുന്നതെന്ന് പരാതിയിൽ പറയുന്നു. ഭർതൃമാതാവ് തങ്കമണിയുടെ പ്രേരണയിലും അനുമതിയോടെയുമാണ് ഇത്തരം പീഡനങ്ങൾ നടന്നതെന്നും യുവതി ആരോപിക്കുന്നു.
ദിവസേനയുള്ള മാനസികവും ശാരീരികവുമായ പീഡനങ്ങൾ സഹിക്കാൻ കഴിയാതെയാണ് കഴിഞ്ഞ ജൂലായ് 27ന് അശ്വതി ഒന്നരവയസുള്ള കുഞ്ഞിനൊപ്പം സ്വന്തം കുടുംബവീട്ടിലേക്ക് തിരികെ പോയത്.വീട്ടിൽ തിരിച്ചെത്തിയെങ്കിലും അന്നുതന്നെ ഷൈജു ഭാര്യവീട്ടിലെത്തി കുഞ്ഞിനെ ബലമായി കൂട്ടിക്കൊണ്ടുപോയി. കുഞ്ഞിനെ തിരികെ കിട്ടാനായി പിറ്റേദിവസം ഉച്ചയ്ക്ക് ഒരു മണിയോടെ സ്വന്തം അമ്മയോടൊപ്പം അശ്വതി ഭർതൃവീട്ടിലെത്തി.
എന്നാൽ അവിടെ വച്ച് ഷൈജുവും മാതാവ് തങ്കമണിയും ചേർന്ന് യുവതിയെ ക്രൂരമായി മർദ്ദിക്കുകയായിരുന്നുവെന്ന് പരാതിയിൽ പറയുന്നു. കുഞ്ഞിനെ മടക്കിനൽകാതെ ഇരുവരും ചേർന്ന് മർദ്ദനം തുടരുകയും അസഭ്യം പറയുകയും ചെയ്തതായാണ് ആരോപണം.
സംഭവത്തിൽ പരിക്കേറ്റ അശ്വതി ശ്രീകാര്യം പൊലീസിൽ പരാതി നൽകി. യുവതിയുടെ മൊഴിയുടെ അടിസ്ഥാനത്തിൽ ഐപിസി വകുപ്പുകൾ ചുമത്തിയാണ് പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചത്. പ്രതികളെ ഉടൻ ചോദ്യം ചെയ്യുമെന്നും കൂടുതൽ വിവരങ്ങൾ ശേഖരിക്കുമെന്നും പൊലീസ് അറിയിച്ചു.സ്ത്രീധന പീഡനവും കുട്ടികളെ ഉൾപ്പെടുത്തിയുള്ള അതിക്രമവും സംസ്ഥാനത്ത് വർധിക്കുന്നതിൽ ആശങ്കയുണ്ടെന്ന് വനിതാ സംഘടനകൾ പ്രതികരിച്ചു. ഇത്തരം സംഭവങ്ങളിൽ കർശന നടപടി വേണമെന്നും ഇവർ ആവശ്യപ്പെട്ടു.