തിരുവനന്തപുരം: തിരുവനന്തപുരം കോര്പ്പറേഷന് മുട്ടടവാര്ഡിലെ യുഡിഎഫ് സ്ഥാനാര്ത്ഥിയായി നിശ്ചയിച്ചിരിക്കുന്ന വൈഷ്ണ സുരേഷിനോട് പ്രചാരണവുമായി മുന്നോട്ടുപോകാന് നിര്ദ്ദേശം നല്കി കോണ്ഗ്രസ് നേതൃത്വം.വോട്ടര്പട്ടികയില്നിന്നു പേര് നീക്കിയതില് അന്തിമ തീരുമാനമാകാത്ത സാഹചര്യത്തിലാണ് നിര്ദ്ദേശം. പ്രചാരണം നിര്ത്തിവയ്ക്കില്ലെന്നും പാര്ട്ടി വൃത്തങ്ങള് പറഞ്ഞു.
സ്ഥാനാര്ത്ഥിത്വം റദ്ദാക്കപ്പെടുന്ന സാഹചര്യം മുന്നില്ക്കണ്ട് ഡമ്മി സ്ഥാനാര്ത്ഥിയെ നിര്ത്താനും കോണ്ഗ്രസ് തയാറെടുക്കുകയാണ്. കളക്ടര് അപ്പീല് തള്ളിയാല്, നാമനിര്ദ്ദേശപത്രിക നല്കാനുള്ള അവസാനദിനം പകരം സ്ഥാനാര്ത്ഥി പത്രിക സമര്പ്പിക്കും.അതേസമയം, വൈഷ്ണ സുരേഷിന്റെ പേര് നീക്കം ചെയ്ത നടപടിക്കെതിരെ കോണ്ഗ്രസ് ഇന്ന് ഹൈക്കോടതിയില് ഹര്ജി നല്കും. മേല്വിലാസത്തിലെ പിഴവ് ചൂണ്ടിക്കാട്ടിയായിരുന്നു വൈഷ്ണയുടെ പേര് നീക്കം ചെയ്തത്.ഇതോടെ തെരഞ്ഞെടുപ്പില് മത്സരിക്കാനുള്ള സാധ്യത മങ്ങുകയായിരുന്നു. പേരൂര്ക്കട ലോ കോളേജിലെ നിയമവിദ്യാര്ത്ഥിയായ 24കാരി വൈഷ്ണയുടെ സ്ഥാനാര്ത്ഥിത്വം തുടക്കം മുതല് ശ്രദ്ധനേടിയിരുന്നു.