തിരുവനന്തപുരം : കേരളത്തില് സ്വര്ണവിലയില് അടിക്കടി മാറ്റമുണ്ടാവുകയാണ്. ഇന്നും കേരളത്തില് സ്വര്ണവില ഉയര്ന്നു. ഇന്ന് 360 രൂപ കൂടി വര്ധിച്ചു. ഇതോടെ ഒരു പവന് സ്വര്ണത്തിന്റെ വില 71,800 രൂപയായി. ഗ്രാമിന് 45 രൂപയാണ് വര്ധിച്ചത്. 8975 രൂപയാണ് ഒരു ഗ്രാം സ്വര്ണത്തിന്റെ വില.ഇന്നലെ പവന് 1760 രൂപ കൂടിയിരുന്നു. ഈ മാസം 15ന് 68,880 ലേക്ക് കുറഞ്ഞ സ്വര്ണവില പിന്നീട് കൂടുകയായിരുന്നു. ഒറ്റയടിക്ക് 1560 രൂപ ഇടിഞ്ഞതോടെയാണ് ഒരിടവേളയ്ക്ക് ശേഷം സ്വര്ണവില ആദ്യമായി 70,000ല് താഴെയെത്തിയത്. ഏഴുദിവസത്തിനിടെ ഏകദേശം ഏഴായിരം രൂപയാണ് വര്ധിച്ചത്.
രാജ്യാന്തര തലത്തില് സാമ്പത്തിക രംഗത്ത് നിലനില്ക്കുന്ന അനിശ്ചിതത്വമാണ് സ്വര്ണ വിലയെ സ്വാധീനിക്കുന്നത്. സ്വര്ണത്തിന്റെ രാജ്യാന്തര വില, ഡോളറിനെതിരെ രൂപയുടെ വിനിമയനിരക്ക്, സ്വര്ണം ഇറക്കുമതി ചെയ്യുന്ന ബാങ്കുകളുടെ നിരക്ക്, കസ്റ്റംസ് ഡ്യൂട്ടി എന്നിവയാണ് സ്വര്ണത്തിന്റെ വില നിര്ണയിക്കുന്നതിന്റെ അടിസ്ഥാന ഘടകങ്ങള്.കഴിഞ്ഞ മാസങ്ങളില് സുരക്ഷിത നിക്ഷേപം എന്ന നിലയില് സ്വര്ണത്തിലേക്ക് കൂടുതല് ആളുകള് എത്തിയതാണ് സ്വര്ണവില ഉയരാന് ഇടയാക്കിയത്. എന്നാല് ഓഹരി വിപണിയില് വീണ്ടും ഉണര്വ് പ്രകടമായതോടെ നിക്ഷേപകര് അവിടേയ്ക്ക് നീങ്ങിയതാണ് കഴിഞ്ഞദിവസങ്ങളില് സ്വര്ണവില ഇടിയാന് കാരണമായത്.